हरि अधिकारी खाजिबाइ मिन आहिन, 
थे तामसोरजुगुला कुरि गलैंचा
तिसिमाम दिनि ताबारि आखाम
ङोसेना लातोसाम पाङ्मा ताला थे व्हाइखा नोन ब्रिला
तिगा खाइमागि छिपा मुला अलोचनाला पुस्तकजुगुरि ? 
हिन्ना, छिपा मुला फोटो बिमा
आठ्वाङ्ना लासि वतन थेन ग्युइसेरकि योग्यता,

वतन थेला चुरिक्यार खानाङए हिन्ना
दिम ? मुसाम थेरि अवश्य आरे
नाकिग्याम सोउ बिसि ब्रिबा ग्रापाटी
याखारगि सडक मुला च्युलच्युल्बा थेन चाङ्मा 
पराइला डिहिरि दोसि म्हाला ह्राङ्बा
हरि अधिकारीला ठेगाना थेनोन सडकतेन थुइबा मुला,

ताबारि खाम्ला हरि अधिकारी याखारगि गतिलोन व्हाइखाब्रिखेनला मिन हिन्गाइ
तिरेम थेला हाकिमसे नोन
थेला व्हाइखा डोबा मुबा
ओम, गोबा–आगोबाला गुङरि कोल्बा मुबा 
हिन्बाम हाकिमसे नोन लाबा मुबा
एम.एम तारा गुरुला शिष्यत्वरि
व्हाइखा टिप्पणी थेन आदेशजुगु बिमा नोन रकमी ताबारि खाम्ला ? 
हाकिमसे म्हान्जि, हाकिम खाइमागि सोचतिबा लाला !

रे गाङ्साल सिजिन्माहेन्से गाउराइखाङला याखारगि ल्हिबा क्षणरि,
हाकिमसे हरि अधिकारीला ङ्होरि याङ्बा क्यालोला
मोर्तोल ठोक्बाकेन लाबा मुबा कापाङ
ह्राङ्निदा थाहा मुला ले ? 
ह्याङ्ला हरिजी व्हाइखा लास्ह्युला !
मिस रेमिङटनला जाजाबा पालिसदार
याजुम्बिजुगु गेन्बा मुबा टक्क !
थे याखारगि लयखिबा अडान मुबा
ओम, ल्हानान गोर मिजुगु, 
थिबा मुबा व्हाइखाब्रिखेनला लिरिक्यार
ब्याङ्सि युधीर थापादा टेबुलला ड्रअरन्हाङरि,
खाराङ्लासि जामेकोलाजुगु ख्रुतोबा पेटीकोट तिसारि ब्याङ्ला ।

हरि अधिकारी तिगा लागाइ ?
ङेबा ह्राङ्बा ताजि, ह्यो ह्राङ कुर्जि ओम मोजुइजि
थे थेला नाम लि हिन्ना,

हरि अधिकारी खाजिबाइ मिन आहिन
ल्हाना ल्हानान मिन आहिनजुगुला हुलरि
खालाइला नाइबा छेन्दे थोसि छेन्देजुगुला नाम्साग्याम
थेला ल्हाम जारी मुला
मिनआरेबा अज्ञातव्हना ल्हाम
तासाइ थे म्योबा ता नोन आहिन ।

(छिगकि दोनः ग्युइसेरकि– शैक्षिक, ग्रापाटी– सूचनापाटी, च्युलच्युल्बा– चिल्लो, चाङ्मा– सफा, गाउराइखाङ– सचिवालय, कापाङ– घोषणा, गोर– वटा, मोजुइबा– झोक्रिनु, नाम– स्थायी, छेन्दे– लास, व्हना– तर्फ)

‘कवितासँग पाँच दशक’ पुस्तकग्याम

दोःबा : यकिना अगाध