म्हेन्दोला डिहि ह्राङ्बा चु ह्युलरि खाजि संकटला दुइ
फ्युक्पोसे याङ्जि ज्याबा ल्हुइ प्राङ्बो सोतोबा नाबा ल्हुइ । 
ज्याबान तासेला मुबा ह्याङ्लान सम्पत्तिसे ह्याङ्ला ह्युल्सा
फिह्युल्पा दलाल चोहोसे चुङ्सि चाजि स्योङ्तेन क्युइ ।।

प्राङ्बो गेनाम ह्युल्बा कादे फिह्युल्पाला ग्याप्पारि
फ्युक्पो ह्युल्बा कादे ह्युलठबि चोहोला चाकररि ।
कात्तेन संघर्ष लासाइ आयाङ्नि सुख ह्युलतेन ह्युल्बासे
स्ह्योरि चासाम ङ्यासे चाबा अन्न आरे प्राङ्बोला बगलरि ।।

किन्जि ह्याङ्ला ह्युलरिन लेण्डुप थेन जेलेन्स्कीसे केबा
ह्युल्ला अस्तित्व मेफ्रा दोना लासि लाबारि बैरीला साप्तो ।
साम्राज्यवादला तादा ङोसेसि सचेत ताइ दारेम ह्याङ्नोन
आहिन्साम ल्हुइनाङ स्होला ह्याङ्दा शत्रुसे न्हाबा परेवा ।। 

अकुत सम्पत्ति छाजि चोहोसे ह्युल्बासे तिका याङ्जि ? 
सिद्धान्तहीन ग्लेठिमसे निष्ठता थेन इमानदारीता चाजि ।
अराजक फिह्युल्पा दलालदा संख्याला दम्भ ओन्तोबा तिल्दा 
देशठाबी चोहोकादेसे एमसीसीला गोइलो क्वान्जि ।।

ग्युइसेर, ल्हुइथाङ थेन गेमि ह्युलरिन डिछ्या तातोला
गेनाम प्राङ्बो ह्युल्बासेन प्रजातन्त्र याङ्तोला ।
पुँजीवादी शोषण थेन दुल्बा सात्तान नासि आता 
दरेम ह्युलठाबीजुगु ताप्सिनाम ह्युल क्योप्पारि रेदोला ।।

काभ्रे ।

(छिगकि दोनः केबा– जन्म, डिहि– बगैंचा, नाबा– रोगी/बिरामी, फिह्युल्पा– विदेशी, ग्याप्पा– नोकर, साप्तो– सेवा, छाजि– कमायो, ग्लेठिम– राजनीति, ठाबी– घाती, ग्युइसेर– शिक्षा, ल्हुइथाङ– स्वास्थ्य, दुल्बा– दमन)