सातान सातान समाजला
मोक्कोन गोबारि म्हाइमा
सातान लिब्रोपा ताजि
स्युर्चिबा मुला
लासिलुसि चेगाइ ओन्बा ह्राङ लासि ।
ङोसेबा मुला थेदा
थाहा मुला थेला मुतेबा हुलिया
लुबाला देन्बा साबिती बयान
खाइमाइ लाबारि आखाम
बरु निश्कलंक चितारि क्रोबारि खाम्ला ।
थेला लाइनुला उर्बरा क्रास्या स्होबारि
थेला लाइनुला नाप थेन र्याल फ्यासि
न्होङ्बा रिम ठिमदा
सभ्य लयरि बाबारि
ओम दुनियारि ज्याबा ह्रिक्पा
स्हेङ्बारि
खाला मुसिम थे
थेदा आम्राङ
थेला मर्यदा आता
साप्रारि ।
थेला नोबा
तिगा एदा थाहा मुला ?
सेमसे आङ्यान
थेला स्वाभिमानफिरि ।
खालाइला जन्ती
खालाइला मलामी
ब्राबा जेक्खे ज्यासि ज्यासि चिला
ओम थेन्ना छाकरि घुन ल्हागतिगाइ बिसि
मोलम पिन्चिला ।
मिनाङ म्हाङ तिसि
एला सन्ततीला चेतनारि
युग जेबा पोबाला लागि
म्हेन्दोकादे सार्ना लाबा खाइमा म्राङ्ला ?
दारे पत्ता ल्हागाब लासि
पुइगो खानाङए
छार ग्रहरिक्यार
थेदा खाइमाइ म्राङ्आतोगाइ
थेला संगत लाआतोगाइ ।
(छिगला अर्थः लिब्रोपा– विरोधी, लुबा– झुठ, देन्बा– सत्य, ह्रिक्पा– चरित्र)
दोःबा : यकिना अगाध
तपाईको प्रतिक्रिया दिनुहोस