खाजिबा बिजाकादेसे छ्योइकादेग्याम मानवता थेन जाम्बुलिङला बारेरि गोबारि म्हाइला, थेन्सेन ग्रेन तामाहेन्से मानवता थेन जाम्बुलिङदा चेगाइ लाबारि लोप्सेला मुला ।

खाजिबा बिजाकादेसे ग्योइकाइ–ग्युइल, प्रकृति थेन ह्रोजुगुला संगतरि सोबारि सेम ल्हागाब लाला, थेनि छार्माहेन्से संवेदनशील दोसेला मुला ओम देन्बा म्हिकादेसे प्लिङ्बा जेबा थेन न्यायपूर्ण जाम्बुलिङला म्हाङ म्राङ्सेला मुला ।

तासाइ काक्ता तिगा मुला बिसाम– मेशिनह्राङ्बा म्हि केना लाबा खुकुआरेबा थेन निर्जीव ग्युइसेर प्रणाली, प्लेनताबा थेन तिङआरेबा समाज, ओम इलोक्ट्रोनिक स्हेग्याम्से थारेङ ताबा स्वार्थी, सेमनोइबा, प्रतिस्पर्धात्मक बिजा मनोरन्जन बार्बुस्हेला दुपान्हाङरि याखारगि सामान्य नागरिकसे बिजाबुमोदा खाराङ्लासि चुराङ्बा वातावरण थेन बार्बुस्हे याङ्ना लागाइ, थेह्राङ्नोन दिमम्हे न्हाबाला लागि रेम्हुन म्याप्चिबा ताला ओम ङ्हाप्बा उत्पीडनला चक्किरि स्याङ्चिबा ताला ।

तासाइ तिगाइमि लानोन तोला ! बिजाकादेदा सोना लानोन तोला ! बिजाकादेदा सोना लाबा बिबा लिउदा सोना लाबा हिन्ना ! जेबा जाम्बुलिङफिरि आशा थेन म्हाङ सोना लाबा हिन्ना ।

ह्याङ्से बिजाबुमोला लागि नोन मारदिहेन्सेन सांस्कृतिक थेन वैचारिक छोरुवा ओसेम चेतनामुलक अभियानला संगठन स्होनोन तोला । सर्वसाधारणदा छोरुवा थेन संगठित लासि, थेन्नान सामुहिक उर्जा थेन स्रोत साधनला भररि, बिजा ग्युइसेर थेन मनोरन्जनला याखारगि छार वैकल्पिक तोसो राप्ना लानोन तोला– टोलटोलरि पुस्तकालय, सांस्कृतिक केन्द्र, छ्योङक्लाङ क्लबकादे ल्होलो स्हेङ्नोन तोला ।

ह्याङ्से बिजा ग्योइकाइ थेन स्यो–स्योला तेबा, बिजा सिनेमा स्हेङ्बा थेन उन्बा, चेमा थेन सांस्कृतिक प्रशिक्षण केन्द्रकादे ओसेम कार्यशालाकादेला जालो रानोन तोला ।

चु गे ह्रेङ्बा थेन चुनाउतीपुर्ण मुला, तासाइ असम्भव बिसाम आहिन । चुला लागि ह्याङ्दा ग्यार्जाछा आहिन, तोङ्जाछा समर्पित सामाजिक थेन सांस्कृतिक कार्यकर्ताकादे तोला । गोना लामा ह्रोलाबाकादे नोन याङ्बारि खाम्ला, तिल्दाबिसाम काक्ता मुतेबा दिमला हिन्ना ।

बिजाबुमोला मोर्चा नोन सामाजिक मुक्ति संघर्षला याखारगि अनिबार्य थेन आधारभूत मोर्चा हिन्ना । लिच्छारि ह्याङसे चु खाइमा गोला ? कादे विनाशकारी परिणाम नामाहेन्से जेक्खे गोसेला मुला ?

(छिगला अर्थः जाम्बुलिङ– संसार, चेगाइ– माया, ग्योइकाइ– साहित्य, ग्युइल– कला, काक्ता– समस्या, केनालाबा– उत्पादन गर्ने, खुकुआरेबा– निरस, ग्युइसेर– शिक्षा, प्लेनताबा– टुक्रिएको, सेमनोइबा– मनोरोगी, बार्बुस्हे– सामाग्री, म्याप्चिबा– घोटिरहेको, ङ्हाप्बा– शोषण, लिउ– भविष्य, बिजाबुमो– बालबालिका, बिजा– बाल, ग्युइसेर– शिक्षा, छ्योङक्लाङ– खेलकुद, चेमा– नाटक, काक्ता– समस्या)

दोःबा : यकिना अगाध