डल झिल कश्मिरला आउदिन जेबा गिक्खे आकर्षक ग्ला हिन्ना । ङानि कश्मीररि चिबा दुइरि ल्हानाह्राङ्बा झिलरि दोंगा क्रेसि कोर्बारि निबा लामुबा । तिरेकुनु ङ्यासे थानथान मुबा । संयोगसे ङान्छे ङोसेबा दोंगा चलप लाबा गफ्फारा स्याप्जि । ओम तिगा तोजि ले ! ङानि थेला दोंगा क्रेजि ओम कोर्बारि थोन्जि ।

गफ्फारासे बिजि, ‘साब, तिनि ङाइ ह्राङ्दा तैराप ताबा खेती उन्ना ।’

चोदे बिसि थेसे व्हाइ कोसिकेन आनन्दसे दोंगा चलप लासि ङान्दा थारेङ बोर्जि । थेसे ङान्दा चुह्राङ्बा ग्लारि दोना लाजि थेरि क्युइफिरि ल्होलो तोसोला खेती ताचिबा मुबा । दोंगा थेनथान्सि थेसे पाङ्जि, ‘ह्राङ्नि चुरि फापस्ह्युगो ओम ब्रास्ह्युगो, म्हिसे खाराङ्बा चमत्कार लाबा मुला ।’

ङान्छे लोङ्सिकेन थेरि काङ जुजि– खानाङए साप्रातेन क्युइरि प्लुम निमुवा बिसि । तासाइ बित्थारि लोङ्बा जेक्खे ताजि । थेलिच्छा ङा आलोङ्ना क्यार्से जासे ब्राचिजि । दिरि क्युइनोन क्युइ मुबा तासाइ फिरि छे युसि साप्रा पोप्सि खेती लाबा मुबा । थेरि कोजिन्माहेन्से दोसि ङानि दोंगारि फ्लिकदोसि क्रेजि ओम गफ्फारासे कमलला म्हन्दोतेन ग्रेनग्रेन बाकादेला गुङग्याम दोंगा चलप लासिकेन स्यान्दो छ्योरिक्यार वाङ्जि ।

थेदुइरि ङान्छे तिगा म्राङ्जि बिसाम– जाजाबा दोंगारि राप्सि याखारगि कश्मीरी केटी ङान्दा च्याचिबा मुबा ।

गफ्फारासे पाङ्जि, ‘साब, थाहा मुला ! चु केटी खाला हिन्ना ?’

ङान्छे थाहा आरे बिबा संकेत लामाहेन्से थेसे बिजि, ‘चु चुर्ला जमिनदारला जामे हिन्ना । ह्राङ्निसे म्राङ्स्ह्युबा चु खेती मुतेबा थेलान सम्पत्ति हिन्ना ।’

ङान्दा चासो ताजि । गफ्फारासे दोंगाला स्युग च्याङ्ना लाजि । थेसे बिजि, ‘साब, चु ल्हानान ग्रेन म्हिला जामे हिन्ना । ङ्यासे दुइरि चुरिन खाला ओम दिमरि तोबा खुजुगु म्हाइसि बोर्ला । दातेदोना चुसे ब्रेल्साङ लाबा आरे ।’

ङान्छे पाङ्जि, ‘थेदा चुरि ङ्योइगो ।’

गफ्फारासे बिजि, ‘साब, चुमि आउदिन ग्रेन स्होमुला, ह्राङ्से ङ्योइसाइ नोन चुरि आखा ।’

ङान्छे बिजि, ‘ङान्छे आङ्योइ, एसेन ङ्योइगो ।’

गफ्फारा ज्युमङेजि । थेसे दोंगा थेनलासि केटीदा याला इशारासे ङ्योइजि ।

केटी जाकि कोल्जि । छोर्जि थे आखा । ओम, गफ्फारिसे थेदा कश्मीरी ग्योइरि तिगाइ पाङ्जि । थेलिच्छा थे ह्राङ्ला तीरह्राङ्बान दोंगा चलप लासि योनान ङानि मुबा ग्लारि खाजि ।

थे झिलला जामे मुबा । डल झिल कादे जेबा मुबा, थे जामे थेबिमा जेबा मुबा– बाङ्बा थेन आलोङ्बा । आउदिन ग्लेला जामेह्राङ्बा म्राङ्मुबा ।

ङान्छे थेला ग्योइ आगोमुबा, थेसे ङान्ना ग्योइ आगोेमुबा । ङान्छे गफ्फाराला ह्रोरि थेदा ङ्योइजि, ‘थेला आपा खानाङ चिमुला, कादे खेती मुला, थेग्याम कादे आमदानी ताला, दिमरि कादे म्हे मुला, झिलरि गिक्खे खामा लोङ्बा आखा ल्होलो ।’

थेसे ज्युमङेसि मुतेबा ङ्योइबाला निसाल पिन्जि ।

थेला दोंगारि आबेबा माकाइला दोङ थेन कमल म्हेन्दोला गट्टा थान्बा मुबा । थेस्हे उन्सिकेन ङान्छे ङ्योइजि, ‘थे पिङ माकाइ थेन कमल म्हेन्दोला गट्टा ङान्दा पिन्बारि ताला ?’

थेसे ङान्दा ल्हानान पिङ माकाइ थेन कमल म्हेन्दोला गट्टा पिन्जि । ङान्छे थेदा ह्रेच्छाक थेनतापुङ्सि बिजि, ‘ङान्छे म्होस्सिन बिबा हिन्ना । ङान्दा तोबा आरे । एसेम चु ह्राङ्ला दिमरि बोर्बारि ह्रुप्बा हिन्ना । बोर्सि निउ ।’

तासाइ थेसे आङ्यान्नि । थेसे जबरजस्ती ल्हानान पिङ माकाइ थेन कमल म्हेन्दोला गट्टा ङान्ना दोंगारि युपिन्जि ।

ङान्छे ङ्योइजि, ‘चुला न्होर कादे ताजि ओम ?’

‘न्होर ? खाराङ्बा न्होर ?’ थेसे अचम्म तासि निसाल पिन्जि । ङान्दा चु ताम गफ्फारासे गोना लाचिबा मुबा ।

ङान्छे पाङ्जि, ‘एसे पिन्बा चुस्हेकादेला ।’

दाते बिसाम ज्युमङेचिबा थेला लिरि गम्भीरता म्राङ्जि । ङ्हो कुम्सिकेन थेसे पाङ्जि, ‘ह्राङ्निसे ङान्दा तिगा म्हानस्ह्युमुला ! ह्राङ ङान्ना बुरि ज्योन्गाबा मुला । ह्राङ्निम ङान्ना डोन्बो हिन्ना । ह्राङ्ला सेमरि न्होर पिन्बा ताम खाराङ्लासि खाजि ?’

थेलिच्छा थेसे ह्राङ्ला दोंगाला क्याबा चुङ्जि ओम ङान्छे तिगा बिबारि म्हाइबाकेन मुला वास्ता आलाना ह्राङ्ला तीर ह्राङ्बा दोंगा योना योना छ्योङ्ना लासि ह्राङ्ला ग्यालामरिक्यार वाङ्जि ।

थेनोन दुइरि झिलरि तिक्खुरि छाल रेजि बिले आमासे ह्राङ्ला जामेफिरि गर्व लासिकेन ताङ्बाह्राङ ।

(छिगला दोन : दोंगा– डुङ्गा, गफ्फारा– दोंगा चलप लाबा म्हि, तोसो– प्रकार, छ्यो– दिशा, स्युग– बेग/गति, म्हे– जना, निसाल– उत्तर, न्होर– रुपैयाँ)

दोःबा : यकिना अगाध