दाङ जोङ्ला देउखुरी सिन्यारि ग्रेन थारु नाम्सा मुबा । थेरि माघी ग्रेनतोसोसे दाङ्मुबा ।
माघे सङ्क्रान्तिला रेदा थारुसे छारदिङ तेन्बा चलन मुला । थेकुनु मोक्कोन नाम्साबा ग्ला गिरिन पोप्मुबा । ब्रोइखाबा चाबास्हे स्होसि चामुबा । दुख सुखला ताम लामुबा ।
छारदिङरि तिगा तिगा गे लासेला बिसिमाम ग्रोइ लामुबा । मोक्कोनसे ह्राङ्ह्राङ्ला योजना पाङ्मुबा । थेनोन जोम्नारि गिसेम गिदा ह्रोलाबा ग्रान (बाचा) लामुबा ।
‘ङाला दिमला छाना ब्रेसिमाम हैरान मुला । आन्हान्ना आताबा मुला ।’ गम्भीर थारुसे पाङ्जि ।
‘ङाइ याखारगि ब्राङ स्होतोबा मुला । क्योङ्से ह्रोलातोला ह्या ।’ कृष्ण थारुसे बिजि ।
‘ह्राङ्निसे तिगा तिगा लास्ह्युला ङाइ ह्रोलाला । ङालाचा चु छारदिङरि छार योजना मुला ।’ लखन चौधरीसे पाङ्जि ।
‘आहिन होइ, तिगा छार योजना स्होजिले थेबा !’ लखनला आपासे ङ्योइस्ह्युजि ।
‘जामे फूलमतिदा लोप्खाङ पुइबा ।’ लखनसे गर्व लासि पाङ्जि ।
‘आहा ! कात्ते ज्याबा योजना ।’ भिडग्याम ताली होङ्जि ।
भिडरि ताङ्बा फेल्चिबा मुबा । फूलमतिला म्हेमेसे छुया (नातिनी)ला लि ट्वालट्वाल्ती च्याचिबा मुबा ।
‘म्हेमेसे तिल्दा ङादा स्हिच्युस्हिबा ?’ फूलमतिसे पेसिकेन ङ्योइजि ।
म्हेमेला मिरि मिख्लि छ्याबारि चुजि । थे मिख्लि ताङ्बाला मुबा । थेसे ज्युम ङेसि पाङ्स्ह्युजि, ‘माइ ! ल्हानान दिङ ङ्हाच्छा एला आङि तिनिलान रेरि कमलरी चिबारि निबा मुबा ।’
‘ङाइ नोन जामाकुनु हेन्सेन हलिया चिबारि निबा मुबा । म्लेस्ह्युजि ?’ लखनसे पाङ्जि ।
‘कमलरी थेन हलिया प्रथा नुप्बा (समाप्त) ल्हानान दिङ ताजिन्जि । दातेनोन तिल्दा डान्चिबा थेह्राङ्बा आज्याबा प्रथा ।’ कृष्णराजसे बोमो ल्हुसिकेन पाङ्जि ।
‘ङ्हाच्छा ङ्हाच्छा माघीरि खाल्ला कमलरी, हलिया चिबारि निसे बिसिमाम ग्रोइ तामुबा । दार्से ह्राङ्लान तिगा गे लासेला बिसिमाम ग्रोइ ताला ।’ गम्भीरमानसे ताङ्सिकेन पाङ्जि ।
‘जा जामेला पालोदोना मुबा आज्याबा प्रथा म्हासिमाम छाया छुया लोप्खाङ निबा च्याम्याङ्मा ताङ्बा खाबा मुला ।’ फूलमतिला म्हेमेसे ज्युमङेसिमाम पाङ्स्ह्युजि ।
जोम्बारि मुबा मोक्कोनसे फूलमतितेन ह्राङ्ला जा जामेदा नोन लोप्खाङ पुइबा ग्रान लाजि । माघीला रमाइलो चलतिचिजि ।
(छिगकि दोनः ग्रोइ– सल्लाह, ग्रान– बाचा, छुया– नातिनी, नुप्बा– समाप्त, छायाछुया– नातिनातिना)
दोःबा : यकिना अगाध
तपाईको प्रतिक्रिया दिनुहोस