कादे जेबा मुला । माबारला ज्याङला नागी नाम्साला कुनिग्याम सुनकोशीरिक्यार च्यामा म्राङ्ला– मझुवा । मझुवाला खास अर्थ ङ्हीनोन पक्षला गोङरि चिसि सामतेन पिन्बा बिबा ताला । तासाइनोन, चुरिचा गोर ङ्ही गाङला गुङरि मुबा ग्ला बिबा अर्थ पिन्ना । चोदे ताना तानान मझुवा गोरङ्ही गाङ्ला गुङरि आताना नागीला दिरि मुला । तासाइ नागी मझुवा थेन गैरी मझुवाला गुङरिचा मझुवा मुला । ओसेमि चुरि चालिसे मझुवा नोन मुला । मतानबास ह्राङ्बा रुङ्बा नाम्सा मुबा थुम मुला ।
मझुवारि युङ्बाला छुगनिबा राप मुला । देउसे युङ्बालामि रोचक राप मुला । कुर्सी युङ्बाला फेबा आकर्षण मुला । बन्दिपुर, मतानबास, नागी, मझुवा ख्यारख्युर बाल्बो युङ्बा, गणेश युङ्बा, हात्ती युङ्बा ह्राङ्बा युङ्बाला ल्होलो मिन मुला । चुर्ला ग्रेनखेप्पा दिमतेबा युङ्बा म्राङ्मा गिक्छारेम दोबा म्हिचा छक्क परतिला । दाते नाम्सा नाम्सारि सडक दोमाहेन्से व्हारा गुङरि मुबा कादे युङ्बाचा थिसि ब्याङ्बा याङ्जि ।
चु थुमला कादे ग्योइ म्हासतिचिम । कादेचा सिमेन्ट ल्हागाब लासि सोना लासाइ नोन क्युइ युबारि खाम्बा आम्राङ्नि । न्हानचा छुगनिला सोनालासि थान्बा म्राङ्ला । बन्दिपुर, मतानबास, नागी, मझुवा, चालिसे मझुवा, गैरी मझुवा, गौंखर्क ह्राङ्बा ग्ला आउदिन रमाइलो छोर्जि । सुन पिन्बा दुइ थेन नामनाम सार्बा दुइरि चु ग्लाला रौनकतानोन फेबा ताबाचिम ।
(चु फोटो थेन सेमताम ङान्छे स्योमि दीपक श्रेष्ठला फेसबुकवालग्याम किन्बा हिन्ना । दोःबा : यकिना अगाध)
(छिगला अर्थः माबार– महाभारत, ज्याङ– उत्तर, सामतेन– विचार, छुगनिबा– गज्जब, राप– कथा, न्हान– चौतारा, स्योमि– पत्रकार)
तपाईको प्रतिक्रिया दिनुहोस