आले सिका ङ्हि बाउले । ग्यालामला कुनिसे खाबा ल्हेङ्मोसे ङाला गोङ्मा ल्हेआखाम्जि । म्राङ्जि नाइपाला खेप्पा ह्रिबा म्हि ग्याम कुनिरि ।

ङ्योइजि ङाइ– ‘दिम खालाङरि आखेला ?’

‘खाइ दुःख याङ्बा म्हिला दिम ठेगान तिलाइ नोन थाहा आताबा टिम आले ।’ खेप्पासे थोपो रिसि पाङ्बासे ङाला सेमरि दुङाल ताजि ।  

ओम दोसि ङाइ ङ्योइजि, ‘जाहान कोलाजुगुकादे आरे ?’

थोपोला कुलाकि डिक्ना लासि पाङ्जि आखे खेप्पासे, ‘मुला बिसे व्हा खाइ आरे बिसे आले !’

ङाला सेम खाराङ खाराङ ताजि, ‘तिल्दा ओराङ सुङ्बा ओम आखे ?’  

ङादा आलेसे ङ्योइजि लु ङ्यान्गो बिसि ओल्कोङ चाङ्ना लासि पाङ्स्ह्युजि, ‘ङालाइ सुखी दिमथेमे मुबा । ङाला ल्हुइ ह्रो ङ्ह्याला लानि ह्राङ्बा लिस्ह्याल, कोइली नामेला ह्राङ्बा काइ, दात्ते सेमरि ठुक डान्मा चु सेम नोन दुकदुक स्हुखाबा मुला ।’ मिरि मिख्लि मि नाङ्नाङ लासि पाङ्बाइगेन लाजि–

‘ङाला ल्हुइ ह्रो दात्ते ङातेन छ्याम आरे । ङाला जाला केबा पिन्सि च्युइ रे रिन ङातेन ङाला कोलादा ख्लासि साङ्गेला दिमरि निजि ।’
आखे खेप्पासे मुरि च्यासि मि न्हाइसि पाङ्जि ।

दोसिनोन ङाइ ङ्योइजि, ‘ओहो ! दोसि तिला ताजि आखे ?’

‘कोला जाजा लोप्खाङ निजि लोप्खाङ निमा हेन्दे ङाइ ज्यामी गेलासि कोलादा लोप्खाङरि निबाला न्होर फाजि । तिनि बिमा न्हाङ्कार बिमा कोला ग्रेन ग्रेन तासि तोरतोर डारि दोजि । दारेम ङाइ लाबा ज्यामी गेसे स्होसि आछ्योजि कोलाला लोप्खाङ्ला फि फाबारि । तासाइ जाक्कार छे लासि कोलादा तोर दोनान लोप्खाङरि पुइजि । ज्याबा खेडोब लाबासे कोलासे फिह्युलरि डोबारि नितोजि बिसि पाङ्जि । कोलाला लागिरि ङाइ याखारगि आप्ता लाबा मुबा । चिबा दिम थेन जाक्कार राबारिबा लासि चाबा ह्वारि चुङ्जि कोला फिह्युलरि पुइबारि । ओम दिम ह्वारि चुङ्सि जादा अमेरिकारि पुइजि ।’
ह्रेङ्बा सा डुइसि क्लेप गाजि ।

‘थे लिच्छा ?’ ङाइ ङ्योइजि ।

आखेसे पाङ्बाइगेन लाजि मिरि मिख्लिला फुम थि लाजि आखे खेप्पाला, ‘कोला अमेरिका निबा ला डु ङिस दोनाम चिठी पुइगाबा मुबा ङाला साङग्युरकादे ङ्योइबान मुबा । ला ब्रे कु तामा हेन्देम न्हा चिठी न्हा तिलाइ साङग्युर थाहा नोन आतानि । ङाइ पुइबा चिठिला निसाल सुत्ताइ अपुइगानि । लिच्छारि खालाइ म्हिग्याम थाहा याङ्जि थेरिन ब्रेल्साङ लाजि रो ! नाम्साला रहन सहन थेतेन आडिक्बा ताजि रो ! थेला म्रिङदा ङा आपा बिसि ङोसेना लाबारि पेबा खाबा रो ! थेतासि जा फ्लिक दोसि आखा रो ! दारेम ङाला काङ यारि बाङ बेजि । मिसे ज्याना लासि म्हि ङोआसे ।’

चोदे बिना बिनान आखेला कुरि मिख्लिसे बाम्जि ।

आखे खेप्पाला सेमतिङ न्हाङ्ला स्हु ङाला न्हाब्याङसे थेमा ङ्यान्मा ङालाइ मिरि मिख्लिला कुलो निजिम । ङाताइ थाहा नोन आतानि । आखे खेप्पादा सान्त्वनाला गोर ङ्हि ताम पाङगे म्हान्बा सेम ताबा मुबा ङाला ओल्कोङसे ताम थिआखाम्जि । ओम, आखे खेप्पादा सोल छ्योइको बिसि ग्यार्जा ङ्हि न्होर पिन्सि मिला मिख्लि सेमफ्यासि आखे खेप्पादा थेग्याम्ला कुनिरिन ख्लासि ङा निजि ।  
 
(छिगकि दोनः केबा– जन्म, डा– कक्षा, खेडोब– अध्ययन, डोबा– पढाइ, फिह्युल– विदेश, आप्ता– निर्णय, निसाल– उत्तर, ब्रेल्साङ– विवाह)