तिरेकुनु गोर ङ्ही ज्योज्योआले याखारगि मुद्दरि फसतिसि अदालतरि दोजि । थे गुङ्ला गिजा लखपति मुबा बिसाम स्यान्दो आउदिन प्राङ्बो । न्यायधिससे चु ताम थाहा तामाहेन्से थे आउदिन अचम्मरि परतिजि ।

थेसे फ्युक्पो ज्योज्योदा ङ्योइजि, ‘ए खाला हिन्ना, एनि ङ्ही छ्यामनोन केबा ज्योज्योआले हिन्ना ? एजा तिल्दा चोदे ल्हाना फ्युक्पो ओम एला आलेजा तिल्दा चोदे प्राङ्बो ?’

न्यायधिससे ङ्योइबासे ज्योज्योचासे निसाल पिन्जि, ‘तिनि बिमा दिङ ङ्हा ङ्हाच्छा ङान्ना आपा डोङ्बा हेन्से ङानि ज्योज्योआलेसे च्योच्यो सम्पत्ति याङ्बा मुबा । बुम (लाख) ङ्ही ङ्ही न्होर ङान्ना बोरि परतिबा मुबा ।’

न्यायधिस आश्चर्यचकित तासि ङ्योइजि, ‘ल्हाउ ठिक मुला । तासाइ दिङ ङ्हारि चुला चोथेबा न्होर खाराङ्लासि जिन्जि ओम ?’

फ्युक्पो ज्योज्योसे पाङ्जि, ‘खाइमा चुसे न्होर याङ्जि, चुसे ह्राङ्दा फ्युक्पो म्हान्बारि चुजि । ल्हानान ग्याप्पाकादे थान्जि । ओम थेन्दा कुल्बारि चुजि– ‘निउ, चु लाउ, थे लाउ ।’ ह्राङ्सेनमि याखारगि म्रा सुताइ आस्योइनि गोल्छेसे चु ब्लेखु दोसिकेन निजि । ग्याप्पाकादेसे गोसिन ख्लाजि दोप्दा मि च्युम्सि चिला, गे लाबा सेम आला । ओम थेन्छे ह्राङ्ला ताङ्बा लाबारि चुजि । न्होर क्युइह्राङ खर्च लाबारि चुजि । च्याना च्यानान चुह्राङ्बा रे खाजि, दारेम चुला यारि छिननाङ नोन न्होर आरे ।’

न्यायधिससे ङ्योइजि, ‘एसेजा तिगा लाजि ?’

फ्युक्पोसे निसाल पिन्जि, ‘ङाइ ? न्होर याङ्माहेन्से ङाइ खाइमाइ ह्राङ्ला याला श्रम आख्लानि । ङातेन गे लाबा म्हि मुबा, तासाइ ङाइ थेन्दा खाइमाइ चुह्राङ आबिनि– ‘निउ, चु लाउ, थे लाउ ।’ ङाइमि बिमुबा– ‘खाउ, ङाला लिच्छालिच्छा ल्हागतिउ । बिले गेलाबारि ङा सातान ङ्हाच्छा वाङ्मुबा । खालाइसे बिबा मुला– खाल्से ह्राङ्ला गे ह्राङ्सेन लाला, थेदा क्योङ्सेन ह्रो लाला ।’ ङाइ खाइमाइ स्यान्दोला भर लासि गे आख्लानि । जाजा ग्रेन तिगा गे खाजि, लगनशीलताला छ्याम लाजि । स्यान्दो ग्याम जेक्खे ह्रो किन्जि । ह्राङ्ला थाहा मुला, चुसे तिगा नतिजा पिन्जि ?’

न्यायधिससे ङ्योइजि, ‘तिगा ?’

फ्युक्पोसे पाङ्जि, ‘ङाला मि सातान ठ्वाङ्चिजि । मुतेबा न्होरफिरि ङाला निगरानी मुबा ओम ङा खाइमाइ खालाइला भर परआतिनि । चुनोन कारणसे ङाला सम्पत्ति ल्हेसिकेन निजि ओम तिनि ङातेन बुमछा न्होर मुला । चोदे ङा नोन आलेसे ह्राङ स्यान्दोफिरि भर परतिसि चिबा हिन्साम, ङा नोन तिनि आलेला ह्राङ्बान हालतरि तासेला मुबा ।’

(यशपाल जैन (१९१२–२०००) याखारगि भारतीय ब्रिखेन हिन्ना । थेला केबा ब्रिटिस भारतला आगरा थेन अबधला संयुक्त प्रान्त अलीगढ जोङ्ला बिजयगढरि ताबा मुबा । थेसे बिजाबुमोला ल्हानान छ्योइकादे तेबा मुला ।

अजंता एलोरा, अहिंसा, भारतला अचूक हतियारकादे थेन तीर्थयात्रा थेला तिगाइ उल्लेखनीय कृतिकादे हिन्ना । भारत सरकारसे सन् १९९० रि थेदा ह्युलला ब्लिछा सर्वोच्च नागरिक डेन ‘पद्मश्री’ग्याम डेन लाबा मुबा । थे नागदा (मध्यप्रदेश) डोङ्बा मुबा ।)

दोःबा : यकिना अगाध