याम्बु । दिङ दाङ्से दाते छारछार म्हेन्दोमाया व्हाइला अडियो थेन भिडियो खाचिबा मुला । चु व्हाइकादेला गुङरि चु दिङ ‘वला फुर्काचे’ व्हाइ क्योङ्बिमा साचेमो ताबारि सफल ताबा मुला ।

चु व्हाइ काइपा कुमार योन्जन थेन काइमो रामला पाख्रिनसे कोबा हिन्ना । दातेदोनारि चु व्हाइदा युट्युबरि बुम डु बिमा ल्हाना च्याखेनकादेसे च्याजिन्बा मुला ।

चु व्हाइला छिग थेन ह्रोल्ज्याङ रोशन फ्युबा तामाङला हिन्ना । ह्रोल्ज्याङ थुछाबा बिसाम काइपा कुमार योन्जनसे लाबा मुला ।

तुन्बा दुइरिन चु व्हाइ टिकटक थेन सामाजिक संजालजुगुरि ल्हानान प्रयोग ताबा मुला । स्यान्दो म्हेन्दोमाया व्हाइसे बिमा ‘वला फुर्काचे’ व्हाइसे चु दिङ ल्हानान साचेमो छाबारि खाम्बा मुला ।

चु व्हाइरि न्हुपला तामाङला ङोसेबाला उत्कृष्ट प्रस्तुती मुला । व्हाइला भिडियो धार्मिक थेन पर्यटकीय महत्व थोबा नुवाकोट जोङ्ला त्रिशुली, किस्पाङ गाउँपालिका ख्यारख्युर छायांकन लाबा मुला ।

म्युजिक भिडियोला काठाक्बा थेन डिक्लाबा रोशन फ्युबा तामाङसे लाबा मुला । छायंकन रोनिस लामासे लाबा मुला ।

भिडियोरि अभिनय लाबा कलाकारजुगुरि कुमार योञ्जन, मनु तामाङ, रन्जिता तामाङ थेन रमेश तामाङ मुला ।

स्याबा काठाक्बा सिङ्गबहादुर तामाङसे लाबा मुला ।

किस्पाङला रमणीय दृष्यकादे गुरु रिम्पोछेला सेमछुबा कु, बौद्ध विहारजुगु थेन तामाङ नाम्साला छ्याम माउलिक गोइलो विशेष लासि (वला फुर्का)से भिडियोदा सेमछुबा स्होबा मुला ।

(छिगला अर्थः साचेमो– लोकप्रिय, बुम– लाख, ह्रोल्ज्याङ– संगीत, थुछाबा– संयोजन, छाबा– कमाउन, काठाक्बा– निर्देशन, डिक्लाबा– सम्पादन, कु– मुर्ति)