हेराङ १२ तापा । बागमती गाउँपालिका वडा नम्बर ४, प्युटाररि आयोजित ङ्हीछा वडाचोहो कप ब्याडमिन्टन प्रतियोगिता सफलतापूर्वक स्योल्बा मुला ।

ब्याडमिन्टन गेदुङ संघ प्युटारला आयोजनामा ओसेम बागमती गाउँपालिका वडा नम्बर ४ प्युटारला न्होरकि ह्रोरि आयोजित खुल्ला ब्याडमिन्टन प्रतियोगिता तापा १० गतेहेन्से १२ गतेदोना सन्चालन लाबा मुबा । श्री कालिदेवी माध्यमिक लोप्खाङ, प्युटारला दोख्राङरि स्योल्बा प्रतियोगितारि बागमती गाउँपालिका थेन बकैया गाउँपालिकाला लासि क्योङ २० टिमसे बोकिन्बा मुबा ।

गेताङला ग्रेनडोन्बो बागमती गाउँपालिका चोहो वीरबहादुर लोप्चनसे स्थानीय तहग्याम उत्पादन ताबा क्लाङ्मिजुगुसे ल्होलो क्लाङ्ग्याम ह्राङ्ला थुमला ङोसेबा स्थापित लाखाम्सेला पाङ्जि । क्रिकेटग्याम्से नेपाली क्लाङ्मिजुगुसे जाम्बुलिङरि मिन ङोसेनना लाबाह्राङ नोन ब्याडमिन्टनग्याम्से नोन चु थुमला क्लाङ्मिजुगुसे ग्याल्साङ थेन स्यानह्युल ङोसेबा स्होबा सम्भावना मुबा थेसे पाङ्जि । थेसे क्लाङ्छ्योङ थुमदा अपेक्षित स्ह्रुगरि ङ्हाच्छा बोर्बारि आखाम्बा स्वीकार लाबान खाबा रेरि झान डिछ्याना योजना स्होसि ङ्हाच्छा वाङ्सेला प्रतिबद्धता लाजि ।

गेताङ वडा नम्बर ४ प्युटारला वडाचोहो रामकुमार लामाला चोहोदानरि ताबा मुबा । लामासे क्लाङ्छ्योङ छारिब्योनजुगुदा सकारात्मक छ्योव्हना अग्रसर लाबारि प्रभावकारी स्हेग्याम ताबा उल्लेख लाजि । ‘चुह्राङ्बा प्रतियोगितासे लागूऔषध दुव्र्यसन ओसेम आज्याबा गतिविधिग्याम छारिब्योनजुगुदा थारेङ थान्बारि ह्रो ताला ।’ थेसे पाङ्जि, ‘वडा न्हाङरि क्लाङ्छ्योङ गतिविधिदा गिक्छा प्राथमिकतारि थान्बा मुला । चुला लागि ङान्छे वडारि ब्याडमिन्टनला कभर्ड हल स्होबाला लागि योजना तयार लाबारि ब्याडमिन्टन गेदुङ प्युटारदा म्होइजेन लाला ।’

गेताङरि ब्याडमिन्टन गेदुङ प्युटारला थुछापा दीपक लामासे लो हेराङरि वडास्तरग्याम ङ्हीछा रेम प्रतियोगिता आयोजना लाबारि ह्रो लाबा बिसि वडा गेदिमदा थुजेछे पिन्जि ।

प्रतियोगितारि गिक्छा ताबा टिमदा नगद रु. २०,०००।– ङ्हीछा ताबा टिमदा रु. १०,०००।–, सोमछा ताबा टिमदा रु. ५,०००।– ओसेम सान्त्वना पुरस्कार रु. २,५००।– पिन्बा मुबा । छ्यामरि उत्कृष्ट क्लाङ्मि थेन अनुशासित टिमदा नगद, मेडल थेन प्रमाणस्योला छ्याम विशेष डेन लाबा मुबा ।

प्रतियोगितारि बागमती गाउँपालिकाला दीपंकर तामाङ थेन मिलन लामा गिक्छा, किसन लामा थेन एनसेल लामा ङ्हीछा, कल्याण कुँवर थेन कपिल कुँवर सोमछा ताबा मुबा । बकैया–१० मन्थलीला सहदेव लामिछाने थेन लेखबहादुर लामिछाने सान्त्वना पुरस्कार याङ्बा मुबा ।

गेताङला सन्चालन ब्याडमिन्टन गेदुङ प्युटारला थुछापा दीपक लामासे लाबा मुबा । डेन सेमताम वडा गाउराइ सरिता तामाङसे थान्बा मुबा ।

(छिगकि दोनः स्योल्बा– सम्पन्न, हेराङ– ललितपुर, गेदुङ– संघ, न्होरकि– आर्थिक, दोख्राङ– प्राङ्गण, क्लाङमि– खेलाडी, क्लाङ– खेल, ग्याल्साङ– राष्ट्रिय, स्यानह्युल– अन्तर्राष्ट्रिय, क्लाङ्छ्योङ– खेलकुद, स्ह्रुग– रुप, डिछ्याना– व्यवस्थित, छ्योव्हना– दिशातर्फ, स्हेग्याम– माध्यम, थुछापा– संयोजक, लो– दक्षिण)