आपा ! ल्हास्सो !!
खाम्बान मुला ?
ङाइ दिमला लातेन म्होइगु लाला
ए सात्तान ज्याबा तादोला  
ए ङादा डान्सि 
मिख्लि अपुइगो ह्या 
तिलाओइमा फोन लामा 
ताम लाबा ङ्हाच्छान 
क्राबा मुबा 
दरेम,
थेराङलासि क्राबारि आता
झन खेप्पा दोजि
ओराङनोन कमजोर ताला 
आपा !
ङा थे म्हाबार गाङ 
थासि निवा लाबा ह्राङ्नोन
रोङरोङबा ग्लारि मुला 
छेह्रेङ्बा बिगेले 
दातेदोना सोबान मुला 
ह्राङ्लाकादे ह्राङ्लान आतामा ह्यान्दे 
ङो आसेबा म्हिनोन 
ह्राङ्ला ताबा टिम 
तिलाइ रे ङ्हाच्छा जेक्खेन 
एला छिक्पा स्होखाबासे 
खोपोङरि थेरापी लासि
नाम्सारि दोबा मुबा 
दातेइनोन 
खान, ग्युरु लामा 
छिक्मा स्हुखाला कि आखा ?
ङा नाम्सारि मुमा 
थे ओर्से तिलोला 
शिखरपुर गाङरि 
बे्रल्सि खाबा लाबातेन 
तोरमार लासि स्याबा खासु
दातेइनोन स्याला कि आस्या ?
नाम ताइमा ह्यान्दे 
ह्याङ्ला नाम्सा क्याम्साङला 
तिमाल गाङ्ला च्योदो–च्योदोरि 
खासुसे फेटा थोइबा मुबा 
दातेइनोन थोइला कि आथोइ ?
भोज्र्याङ, ल्होङ्सल, कुरुवास
थेन कल्धार नाम्साला 
थेरेरे दिमरि क्यार
तार थेन वाला साप्रा  
दातेइनोन फोर्ला कि आफोर ? 
तार थेन वाला साप्रा  
फोर्बा म्हिनोन 
ङा ह्राङ्नोन 
थारेङ ताजि ताला  
खाल्से फोर्से व्हा !
मिसे खाराङ्बा म्राङ्सि टिबा मुला ?
आम्राङ्बा मुला विसाम पाङ्गो ह्या 
म्राङ्बा चस्मा ग्लुसि पुइकाला 
ल्हानान झरी तामा
भुमथान, कोलगाङ थेन 
साप्रा वाला गाङरि 
फुइसि सार्बा स्यामो 
म्हाइबारि निमुबा ङा 
एदा आउदिन सेम ताङ्बा मुला विसि  
दाते आले आङा निमुलोम ?
ला ह्वाराला 
आम्बा दोङरि 
सत्तान जाङ स्होबा 
बोङबार नामेसे 
दातेइ जाङ स्होबा मुला कि आस्होबा मुला ?
नानाकादे मायुङजा निइ बिसि 
एदा ह्रुप ताबारि 
खाबा मुला कि आखामुला ? 
एसे हार स्होबान लामा  
ङानोन माकाइ डाङ्लाला 
हार स्होबा  
पे लाबान क्लाङ्बा
ग्रेन राङ्गा 
थेराङबान मुला कि जाजाबा ताजी ? 
ह्राङ्ला ल्हुइ ह्रो 
थेन
पाराङ कोला म्हाबाला दुङालरि 
सेम बोल्बारि आता ह्या आपा
छ्यामरि मुबा 
जा, जामे थेन चाङ्से 
स्हुखाबा दुइरि 
सेम बुना लामुला कि आलामुला ?
ओम
ङाला म्हान्बा ह्राङ आताजि बिसि 
गु गुरि निसि दुइ–दुइरि
ङा डान्सि क्रामुला रो
ङाइ थेबा मुला  
दातेइ क्रामुला कि आक्रामुला ?
आपा ! 
थेराङ लासि सेम स्हुखासि
आक्राको ह्या 
ङा खाराङ्लासि ताला 
ङा न्हाङ्ला ङा दोबारि  
चु थोप्साङ आथोप्बा, 
थोप्साङ थोप्ला व्हा बिसि 
बोल्बान मुला 
ङा दिमरि खाउ कि आखाउ बिमा 
एला च्युकुर ताबा लि थेन 
सेमसे म्हाइसि टिमा सुताइ नोन 
खाउ बिबारि आखाम्बा 
बध्यता बिसे ह्या विडम्वना मुला 
ङाइ कल लामा 
मिख्लि आपुइना  
च्याङ्बा ! खाम्बान मुला 
बिसि ङ्योइगो 
ङा ओराङनोन खाम्बा ताला 
आपा ! 
ए ङाला छोन्बोन ला हिन्न 
फ्या लाला, फ्या लासिन टिला ।

(छिगकि दोनः पे– नक्कल, थोप्साङ आथोप्बा– अभागी, थोप्साङ थोप्बा– भाग्यमानी)