भूमाफियाजुगुला भयंकरला रजगज
ग्यालठिपा बाङला तेनरि
स्योङ्ला ग्यालाम डुङ्बाजुगुसे
ह्राङ्ज्युङतेन ङोबा साइ
नाबारि विवश ताजि
ओन्छ्यान !
दुल्बारि परतिजि साम्हिजुगु
स्योङ–हुइ लासि अतिक्रमण
स्होबा मु थुर्बा दिमग्रेनजुगुला
छिँडी थेन ख्राङ्गा नाङ
वाङ्सि होन
स्होबा मुला, छ्युलसोक्खे सहर बजारदा
खण्डहर आजेबा स्होबा मुला ।
नाम्सा–बस्ती ओम जेबा ह्रि ब्लेदा
सति घाटरि ब्योङ्बा क्युइह्राङ ब्योङ्जि सललल...
बोमोलि किन्सि रुद्रमती
गोक्डेङ्बा छ्युलुङ ह्राङ्बा दोसि
फ्युफ्यु ह्राप्बाकेन मुला बिष्णुमती
सातान विवश दोसि ब्योङ्बा
बागमती दोजि तिक्खुरि कोशी
बोमोलि किन्सि ब्योङ्बाकेन लाबा स्योङ्तेन
ब्योङ्जि ल्हानान म्हि ओम धन
खिस्रिक्क लि किन्सिे गोम्जि तामआपाङ्बा लादा
आम्लेना लाबा म्लेबाला ह्रिजि फ्यास्हिङ
आथेनि कृतिम सेम मुबा म्हिला गोम्बा
कोन्ज्योसोमसे
किन्सिन ख्लासि खि
ब्योङ्सि निबा होन स्योङ हुइसे ।
कुलंगारजुगुला अनुग्राही आरेबा
भुमाफियाला ङ्यान्दिरि निर्लिप्त प्लटिङ
घृणा थेन ग्लानीला छोनसे च्युर्बा ककर्मला कहर
डोजर आतंकसे छिगछिग ताबा
घाइते ल्हागाङ
फेल्गेबाला विकल्प अनुसन्धान आलाना स्होबा ख्वाबा
ल्हागाङ्ला तिङ क्लेसि स्होबा च्युप्बा
कच्ची ग्याम
ब्योङ्जि झरीसे ङ्योइसाङ लाबा
डुइतेन छ्याम
डुइ स्योङरि ताजि ग्युर्बा
ग्यालल्हामजुगुसे ताबारि आखाम्ना डुइला दोइ
फेजि ल्हाम ल्हाबा ल्हाम्पाजुगु
टाङ्जि झोलुङ्गे पुल
बोसिमाम ब्योङ्जि मोटर ब्राबा पक्की पुल
स्योङ्तेन छ्याम
स्योङह्राङ्नोन दोसि
ठिक चु दुइ
कोबाकेन मुसिम ह्रिला चरी ह्रिरिन
बिरहला गजल
किन्जि निस्वार्थ सोझो सेम मुबा स्योङ्से
ङानोन हिन्ना बिबा बाठा म्हिजुगुदा खि ।
सभ्यताफिरि लाबा अत्याचार
प्लोनछ्योङ्सि क्याच्चा तादारि दोबा चतुर
ह्युल संचालकजुगु
चोभार गल्छेडा वाइसिकेन प्योसि ब्योङ्बा
च्यासि क्युइला भेल
लोङ्बा मुला ।
बाठा चतुर म्हिजुगु
लाबा ह्राङ्ला ख्योल्बा आप्ताजुगु
ङामला जल विनायकदा साक्षी थान्सि
चाबाकेन मुला ग्रानला छ्याम्बाजुगु
तिगा लासे ?
आतातोबा ताजिन्बा मुला प्रलय
आपेबा मुला, समवेदना म्हाबा सरकार
आस्याप्सेला न्हाङ्गारला ब्रान्बारि
आश्वसनला प्याला थुङ्बान
सोबारि विवश मुला
दैवी प्रकोपरि परतिबा पीडित
ज्योमोगाङ म्ह्युसि, ल्हागाङ ब्योङ्सि, ग्यागारदान ब्लुम्बारि
मुतेबा मुतेबा सेमजुगु ज्योनज्योन ताजिन्बा मुला
बेपत्ता ताबा ह्राङ्लाजुगुला
ल्हुइ ज्याबाखाम्बान म्हाइना म्हाइनान
थाल्सेला मुला रेजुगु
किन्सिन ख्लाजि स्योङ्से होन दोसि खि
बाठा म्हिजुगुला ताङ्बाजुगुला लहर... ।
पाँचखाल–११,काभ्रेपलान्चोक, दाते– लिमासोल, साईप्रस ।
(छिगकि दोनः खि– बदला/पैंचो, होन– बाढी, ग्यालठिपा– राजनीतिक, ग्यालठिपा– राजनीतिक, तेन– आड, ह्राङ्ज्युङ– प्रकृति, ङोबा– जिस्क्याएको, साइ– मूल्य, नाबा– ब्योहोर्नु/सहनु/भोग्नु, ओन्छ्यान– कठै, दुल्बा– दमन/मारमा पर्नु, छ्युलसोक्खे– जलमग्न, ब्योङ्बा– बग्नु, गोक्डेङ्बा– भिमकाय, छ्युलुङ– सागर, गोम– पुकार्नु, फ्यास्हिङ– माफी, ङ्यान्दि– कारण, छिगछिग– छियाछिया, छोन– रंग, ल्हागाङ– पहाड, फेल्गेबा– विकास, च्युप्बा– साँघुरो, ग्युर्बा– परिणत, ग्यालल्हाम– राजमार्ग, ल्हाम– यात्रा, ल्हाम्पा– यात्री, प्योबा– उर्लिनु/उम्लनु, ख्योल्बा– गलत, आप्ता– निर्णय, ज्योमोगाङ– हिमाल, म्ह्युबा– पग्लनु, ग्यागारदान– मधेश/तराई, ज्योन्ज्योन्बा– थिलथिलो)
दोःबा : यकिना अगाध
तपाईको प्रतिक्रिया दिनुहोस