गुफागाङला थे ल्हाला चेरिक्यार साम्हेन्दोतेन लेङ स्होसि फाप्बा हिन्ना, क्योलोलो । थे ल्हाला २२५० फिट नोबारि नोन प्राबा दिनिसे क्रोजि, आउदिन । जाम्बुलिङ लेप्बा ल्हेचिबा मुला बिबा छुगनिना छोर्जि, थे गाङरि ।

रे ह्याल्सिकेन निमाहेन्से पाँचपोखरी (ग्योइङ्हा) ग्याम हुरछ्योङ्सि खाबा सिमसिमे नामसे तिगाइ सिम्ना लासाइ नोन थे ल्हारि टिसर्टसे गे चलप लाजि । डोन्बो स्योमि कामरे खाला बिसि लामा, बोम्बोकादेसे बाङ ह्रिबाला चिम– प्रकृतितेन । आहिन्साम मुतेबा रे झरि ताचिबा चिम, थेरि । कामरे तिल्दा नाम आताइनि ? छक्क ताजि । ङानि थेरि दोमा बोम्बोकादेसे वाङ सेरग्याम लासि बाङ ह्रिबाकेन मुबा, प्रकृतितेन– ‘ह्याङ्ला डोन्बोदा तिगाइ आतागाइ’ बिसिमाम ।

डिक्खेन समाजला निम्तोरि दोबा हिन्ना थेरिक्यार । क्यौले ठाना आधारभूत लोप्खाङरि तिगाइ काठुइलिच्छा ल्हाला आलु थेन प्रुमोला थुबा मोरे म्ह्याङ्जि । थेलिच्छा ज्यामिरे तासिकेन मेलम्ची फाप्बा ङानि नमुना ङ्हे डेरिरिक्यार चिया म्हाइसिकेन सोझोन वाङ्जि । स्ह्योरि आउदिन ब्रोइखाबा चिया थेरि थुङ्बासे थे ब्रोइसेन म्लिक्का दोसि वाङ्बा हिन्ना । तासाइ ङ्हेनोन जिन्जिम ।

चिया बिमा थेरिक्यार स्या सुकुटीला छोङ्खाङ ल्हाना चिम । नाम्सारि दाते चियाबिमा स्या छोङ्खाङ ल्हानान ताबा छार नुर आहिन । जाकि मार याखारगि चिया छोङ्खाङ म्राङ्सि थेनताजि । मेलम्ची होनला पोर दातेनोन ओस्बोन मुला थेरिक्यार ।

‘चु खाजिबा ग्ला हिन्ना ?’

‘मेलम्ची ।’

‘आहिन, चुर्ला चु जाजाबा बजारला खाजिबाइ मिन आरे ?’

‘असिमुरे ।’

ङादा जिज्ञासा ल्हागतिजि, ‘असिमुरे खाराङ्लासि ?’

चिया टेबलरि चिबा स्थानीयसे पाङ्जि–

चु चे पाण्डेला बिर्ता चिम । असी मुरीम साङा कुत ह्रुप्जिम, थेदुइरि । तासाइ, नाइसि मुतेबा ब्याङ्बासे ग्लाला मिन नोन ‘असिमुरे ।’

नाम्साला मुतेबा मिनला ग्याप्से राप मुला । थेदा म्हाइबारि नोन छेम खामुला ले !

रे थाल्सिकेन निजि ।

चिनि आरेबा ङ्हे चिया थुङ्सि वाङ्जि जहरसिं पौवारिक्यारला हान्डो ।

(छिगला अर्थः ल्हा– लेक, चे– दमार/फाँट, प्राबा– चर्को, जाम्बुलिङ– विश्व, छुग– गज्जब, ह्याल्बा– ढल्किदै, स्योमि– पत्रकार, कामरे– शनिबार, डिक्खेन– सम्पादक, काठुइ– छलफल, प्रुमो– टिम्मुर, मोरे– अचार, म्ह्याङ्बा– चाख्नु, छोङ्खाङ– पसल, नुर– विषय, होन– बाढी, पोर– घाउ, छेम– मज्जा)

दोःबा : यकिना अगाध