ह्याङ्से फेल्गेबाला परिभाषा चुह्राङ्लासि लाचिबा मुला । फेल्गेबा बिसि राज्य कोषग्याम खाबा न्होरदा कार्यान्वयन लाबारि कर्मचारीतेन डिक्सि न्होर युपुङ्सि कमिशन चाबा रिम दान्देदोना मुला ।
ह्याङ्दा ह्युल्बासे फाबा करग्याम खाबा बजेट बिबा आछोर । चु राज्य कोषग्याम खाबा म्हान्ना ।
सरकार एसे खाम्बा कि ङाइ खाम्बा बिबाह्राङ लासि ‘वाला छ्योइरि’ बजेट ब्रिसि ङाइ बाबा बजेट बिबान नाम्सा नाम्सा, टोल टोल, दिम दिमरि कार्यकर्तादा परिचालन लासिकेन ब्राला । ङाला पालारि ङाइ पार्करि, ग्यालामरि, सिंचाइरि, जालीरि, लाथानरि, बिहाररि ल्होलो... । कार्यकर्ता नेता थोसि कोर्सिमाम १०–१२ म्हे म्हि पोप्सि ङाला पार्टीसे पारतिबा बजेट बिसिमाम पाङ्सिकेन ब्राबा कादे मुला कादे ।
ग्यालाम स्होला । कालोपत्र । ङ्हीरेरिन बोला । न्हा ह्युल्बादा चासो मुला न्हा राज्यादा नोन ! महोत्तरीला घट्नासे पेना लाला । ह्युल फेल्गेबा लाबारि तिगा कर्मचारी थेन नेता गेदिमरिन म्हुनाला १२ ङ्ह्यादे चिसि लातोला ? चु आहिन, मुतेबा डिक्सि फेल्गेबाला मिनरि लुटेराकादेला म्लाङ धन्दा चु ह्युल नाङ्ला नोइ हिन्ना ।
ह्युल्बासे राजनैतिक चेतनाला फेल्गेबा लाबारि जरुरी मुला ।
आज्याबा गेकादेला भण्डाफोर लातोला । ह्युल्बा मुतेबा फेल्गेबारि थुइतोला । राजनीतिकर्मीकादेसे सही ग्लेठिम ख्लाजि । कर्मचारीसे ह्राङ्ला जिम्मेवारी म्लेजि । ह्युल्बासे ह्राङ्ला कर्तव्य म्लेजि । खबरदारी आलानि । ह्याङ्से केवानाङ थेनोन पार्टी थेनोन म्हि दाम्बा बिमा स्यान्दो तिगाइ सोचतिबारि आखाम्नि । फेल्गेबा बिबाम म्हिला सोच थेन व्यवहाररि पोबा खाबा हिन्ना । थे ताबारि खाम्बा आरे । चुह्राङ्बा सुधारवादी नीतिसे तिनिदोना खाजिबाए ह्युलसे लि पोबारि खाम्बा आरे ।
बर्खारि खाबा बजेटसे ह्युल स्होबारि आखाम । ह्युल स्होबारि ह्याङ्से क्रेप्सा खितोला । चुकादे ग्याम ह्युलला लि पोला बिसि आशा लाबा कावादा मिन्बा बेल ताङ्बा न्हा स्हु ह्राङ्बान हिन्ना ।
दक्ष ह्युल्बाबाङ छारिब्योनकादे फिरग्याप ह्युल ल्हागतिबा बिबा ह्युलला लागि आज्याबा थोप्साङ हिन्ना । चु ह्युल फेल्गेना लाबारि छारिब्योन बाङ्दा कानोन तोला ।
रोजगारला ग्यरेन्टी लातोला । मुतेबा ह्युल फेल्गेबा थेदुइरि जेक्खे ताला ।
(छिगला अर्थः फेल्गेबा– विकास, न्होर– पैसा/रकम/आर्थिक, नोइ– रोग, आज्याबा थोप्साङ– दुर्भाग्य)
तपाईको प्रतिक्रिया दिनुहोस