‘बोर्जि बोर्जि । पेटारे रादा च्यानसे बोर्जि ।’ लोकबहादुरला आपा गुलेलीसे च्यान स्युर्चिस्ह्युमुबा ।
‘बबु मि च्युम्गो । जाजा म्हिसे च्यान म्राङ्जि बिसाम ब्ला म्हाला ।’ लोकला आमासे सुङ्स्ह्युजि ।
‘आमाले होइ कादे लोङ्खेप्पा च्यान ।’ लोकबहादुर म्हाङरिन क्रिङ्जि ।
‘ओइ लोकबहादुर तिल्दा बोटोक्चिबा ? आज्याबा म्हाङमि आम्राङ्नि ? रेगो तिनि तापाग्रेन लाला गिक्छा नाबिङरे हिन्ना । च्यान छ्योकु लाबारि निबारि गाइजि ।’ आपासे सुङ्स्ह्युजि ।
‘थारेङ थारेङला डोन्बो दोगास्ह्युजिन्जि । एनि आपा कोला ताम जेक्खे लासि चिउ ।’ आमासे छेर्सिकेन पाङ्स्ह्युजि ।
लोकबहादुरसे आपादा फ्याङ चुङ्जि । थेला ल्हुइ छोनछोन दार्चिबा मुबा ।
‘तिल्दा लोङ्बा ?’ आपासे ङ्योइस्ह्युजि ।
‘अहँ ङाम आला । म्हाङरि पेटारेदा बोर्जि । छ्योकु लामा ङादान बोर्जि बिसाम ।’ लोकबहादुरला ल्हुइ टुसे छ्योप बाम्जि ।
‘छ्योकु लाबा ग्लारि च्यान आता बबु । थेरि ए ह्राङ्बान जाजा म्हिसे छ्योकु लातोला ।’ आपासे सुङ्स्ह्युजि ।
‘तिल्दा जाज म्हिसेन छ्योकु लातोबा ? ग्रेनसे लासाम तिगा ताला ओम ?’ आमासे ङ्योइस्ह्युजि ।
‘ब्रेल्साङ ताबा थेन ग्रेनसे लामा च्यानसे झन स्हु पिन्ना रो । ङ्हाच्छा पदमबहादुरला आकुसे छ्योकु लामा च्यानसे आउतिन सताप लामुबा रो ।’ आपासे सुङ्स्ह्युजि ।
‘च्यानला छ्योकु तिल्दा लातोबा ओम आपा ?’ लोकबहादुरसे ङ्योइजि ।
‘मंगर समुदायरि च्यानला छ्योकु लातोला । चुह्राङ लासाम रा आचा, म्हिदा स्हु आपिन बिबा विश्वास मुला । थेतासि आखे म्हेमेला पालाहेन्सेन चलप तासिकेन खाबा चलन मुला ।’
‘चु जाजा लाइनुसे मुतेबा रीत छ्योना लासि छ्योकु लाबारि खाम्ला ओम । ओथेबा ग्रेनखेप्पा ड्वा बली नोन फुल्तोला ।’ आमासे ङ्योइस्ह्युजि ।
‘छ्योकु लाबारि ह्याङ्ला नाम्साला जेठाबाठा लीला थेन मोहनबहादुर आकुसे लोपस्ह्युला । नाम्साबासेम ह्रोनिसे पाङ्बा जेक्खे लासाम ताला ।’ आपासे सुङ्स्ह्युजि ।
‘छ्योकुम लाला । तासाइ ड्वा बली पिन्बारिम लोङ्बा खाला ।’ लोकबहादुरसे लोङ्सिकेन पाङ्जि ।
‘बली पिन्बा, प्रसाद स्होबा, बोठाबा मुतेबा गे ग्रेनसे लाला ।’ आपासे सुङ्स्ह्युजि ।
‘याखारगि सेम्चेन सोना लाबारि स्यान्दो सेम्चेनला बली पिन्सि छ्योकु लाबा खाराङ्बा अचम्मला चलन ।’ आमासे ङ्हो कुम्सिकेन पाङ्स्ह्युजि ।
‘तिगा दार्से ह्याङ्ला नाम्सारि चितुवासे रा आचा ? ओमाइ जेक्खे हेमबहादुर ज्योज्योला खसी चितुवासे बोर्जि ।’ लोकबहादुरसे पाङ्जि ।
‘च्यानसे रा स्याप्साम आचा ओम !’ आपासे ज्युमङेसि पाङ्स्ह्युजि ।
‘छ्योकु लामा नोन रा चाबारि आख्ला बिसाम तिल्दा छ्योकु लाचितोजि ?’ लोकबहादुरसे पाङ्जि ।
‘ङ्हाच्छा ङ्हाच्छा खाल्से सताप लामुबा थेला छ्योकु लामुबा । थेलिच्छा थेसे सताप लाबारि ख्लाला बिबा सोंच मुबा । चितुवा नाम्सारि वाङ्सि रा चासि सताब लाबारि चुमाहेन्से छ्योकु लाबा चलन ताजि । दार्सेम ह्याङ्ला मंगर नाम्सारि चु देवालीह्राङ नोन ताजि ।’ आपासे पाङ्स्ह्युजि ।
‘ओहो ! छ्योकु दिमरि ल्हानान म्हि पोपजिन्जिम । थेरि निगे ।’ आपासे सुङ्स्ह्युजि ।
‘ताला । ताला ।’ लोकबहादुर थेन थेला आमाला सुङग्याम चुनोन छिग प्लाकस्योर्जि ।
थेनिकादे सोमनोन छ्योकुला सामान थोसि छ्योकु दिमरिक्यार वाङ्जि ।
‘स्मार्ट दिम’बिजा राप पोप ग्याम
(छिगकि दोनः छ्योकु– पूजा, तापाग्रेन– मंसिर, नाबिङरे– बुधबार, ब्रेल्साङ– विवाह, स्हु– दुःख, सेम्चेन– जनवार)
दोःबा : यकिना अगाध
तपाईको प्रतिक्रिया दिनुहोस