याखारगि दोङरि गिक्खे कुलुलु चिमुबा । कुलुलुसे रेरि आम्राङ, थेतासि थेदा रेकाना नोन बिमुला । थे रेगि ह्राङ्ला जाङरि लासि चिमुबा । म्हुन तामाहेन्से जेक्खे थे सिकार क्लाङ्बारि थोन्मुबा ।

छेप्बाला रे मुबा । रेला दुइरि मुरि दिनि मेफुम तेबान चम्कप ताचिबा मुबा । आउदिन छेप्बा छाचिमुबा । थेनोन दुइरि खानखानग्याम फ्याङ्सिकेन खाबा हाँस थे दोङ्ला हाँगारि चिजि ओम बिजि, ‘ओहो ! कादे गाह्रो ताजि छेप्बासे ! मुरि दिनिम मेह्राङ क्रोचिबा मुला ।’

हाँससे बिबा ताम कुलुलुसे नोन थेबा मुबा । थेसे बिजि, ‘तिगा रो ? दिनि चम्कप ताचिबा मुला ? चुमि सोझोन लुबा ताम हिन्ना । लानि चम्कप ताबा बिसाइ नोन ङाइ ङ्यान्सेला ।’

हाँससे बिजि, ‘लानिम म्हुना चम्कप ताला ले, रेरि आहिन । दातेम रे हिन्ना । रेरिम दिनिन चम्कप ताला । दिनिला लेप्बा स्हेर ल्हेमा छेप्बा आउदिन छामुला । तिनिम हिन्बाम लोङ्ना लाबा छेप्बा मुला ।’

कुलुलुसे क्यालो लासिकेन ङेजि ओम बिजि, ‘दोगो दोनाम एसे दिनिला ताम लाबाकेन मुबा, दारेम दिनिला स्हेरला ताम लाबारि चुजि । देन्बान एमि मुर्खह्राङ छोर्जि । ओइ आले, न्हा दिनि मुला, न्हा स्हेर । चुमि मुतेबा भ्रम जेक्खे हिन्ना ।’

हाँससे कुलुलुदा ल्हानान गोना लाबा बाङ लाजि कि दिनि मुला ओम थेलान कारण छेप्बा छाचिबा मुला । तासाइ कुलुलु ह्राङ्ला अडानरि कारकोर आकोनि । कादे गोना लासाइ नोन थेसे चुनोन बिचिजि, ‘न्हा दिनि मुला, न्हा दिनिला स्हेर, न्हा छेप्बा ।’

ङ्हीनोन ह्राङ्ला तामग्याम कासक कोसोक आतामाहेन्से कुलुलुसे बिजि, ‘चु ङामथामा स्यान्दो दोङरि ङाला ग्यर्जाछा ज्योज्योआलेकादे मुला । थेनिकादे मुतेबा आउदिन बुद्धिमान मुला । ब्राउ, थेन्ना ङोन्छाङ निसि निर्णय लाइ– देन्बान मुरि दिनि मुला कि आरे ।’

हाँससे कुलुलुला ताम ङ्यान्जि । कुलुलुसे हाँसदा बोर्सि स्यान्दो दोङरि दोजि । थेरि ग्यार्जाछा कुलुलुकादे मुबा । कुलुलुसे ह्राङ्ला ह्रोजुगुदा ङ्योइसि बिजि, ‘ज्योज्योआलेजुगु, चु हाँसला ताम मुला कि दाते रे हिन्ना ओम मुरि दिनि चम्कप ताजिबा मुला । ह्राङ्निसेन निर्णय लास्ह्युगो– दाते रे हिन्ना कि आहिन ओम दिनि चम्कप ताचिबा मुला कि आरे ?

कुलुलुला ताम थेसि स्यान्दो कुलुलुकादे नोन ङेबारि चुजि ओम हाँस ब्रेसिकेन बिजि, ‘तिगा रो ? मुरि दिनि चम्कप ताचिबा मुला ? एमि काना चिम । ङान्ना नाम्सारि चुह्राङ्बा लुबा ताम लाउ थाब्राउ ।’

तासाइ हाँस कुटिसि चिबारि आखाम्नि । थेसे बिजि, ‘ङाइ लुसिमाम पाङ्चिबा आरे । दाते रे हिन्ना ओम मुरि दिनि देन्बान चम्कप ताचिबा मुला ।’

हाँसला ताम थेसि मुतेबा कुलुलुकादे बोमो खाजि ओम हाँसदा तोबारि व्हाजि ।

हाँससे ह्राङ्ला ल्हुइ सोना लासि ह्यार्जि । थोप्साङ थोप्बासे रेला दुइरि कुलुलुकादेसे आम्राङ, आहिन्साम थेन्से थेदा सेसेला मुबा । रे ताबासे हाँससे प्रष्ट म्राङ्चिबा मुबा । थेतासि देबाः लासि ह्यार्सि थेसे ह्राङ्दा सोना लाजि ।

हाँससे स्हुला छ्याम ह्राङ्से ह्राङ्तान बिजि, ‘देन्बा ताममि चु हिन्ना कि दाते रे हिन्ना ओम मुरि दिनि चम्कप ताचिबा मुला, तासाइ ल्हाना कुलुलुजुगुला कारण देन्बा नोन लुबा दोजि । खानाङ मुर्खकादेला बहुमत ताला, थेरि देन्बा नोन लुबा दोला ।’

(भारत–दर्शन हिन्दी ग्योइ ग्याम पोप्बा । चु पन्चतन्त्रला नीति राप हिन्ना । पन्चतन्त्रला राप पण्डित विष्णु शर्माला मिनसे ब्रिबा लामुला । थेसे ब्रिबा छ्योइ जाम्बुलिङनाङ प्रचलित मुला । डुछा शताब्दीरि दोःबा पन्चतन्त्र दातेदोनारि ल्हानान ग्योइरि दोजिन्बा मुला ।)