ज्योथेबाला पिङगाइ छ्योइ छिबा दुइरि ङा छ्योआछ्यो ब्रेदिङलाचे मुबा । जाजाबा । आथाङबा । थे दिङहेन्देन ङाइ ज्योथेबाला पिङगाइदा डोम्याङ मुबा, सेसि आसेना । जामा दुइरिन ङाइ म्हान्मुबा, ‘छ्योइदा ह्राङ लासिन ज्योथेबाला पिङगाइ ताइ नोन तिरेम ह्रुप ताम्याङसाम तासेला ।’
    
ङाइ तिरे ज्योथेबादा आदेङदेङ लासि ङ्योइजि, ‘ज्योज्यो, एला पिङगाइदा ङाइ ङाला ओन्छाङ म्राङ्बा ङ्हाज्याङ सेम मुला । ह्राङसे ह्रुप लासि दोन्ला ?’

ङाला ओराङबा सेमदा थेसि ज्योथेबासे तिरेम ज्युम नेसि ङादा सुङ्जि, ‘ङाइ ए ङ्हिदा तिरे ह्रुप लासि पिन्ला ।’

ङादा ताङ्बा खाजि ।

बिमाइह्राङ आदेङ्देङ लासि तिरे कुनु ज्योथेबासे पिङगाइ थेन ङादा याम्बुला न्युरोडरि ह्रुप लासि दोन्जि, दोक्छेबिमा ङ्हाच्छा । जामा ङा च्युइसे सोम दिङ्ला ताजिन्मुबा ।

ह्रुप ताबाइतेन पिङगाइसे ज्योथेबापाट्टि दोसि ङ्योइजि, ‘चु आङाचा खालोम ?’

ङादा हापख्वाइसि ज्योथेबासे सुङ्जि, ‘ङाला आङा थेबा, याङ्जी ।’

ज्योथेबासे ओते तिला बिमुबा, पिङगाइसे नोन ङादा हापख्वाइजि, ज्योथेबासे ह्राङ लासिन । ङाए पिङगाइला कुरि लेप ताजि, ज्योथेबाला कुरि ह्राङ लासिन ।

पिङगाइ ङादा जेबा छोर्जि । ल्हानान जेबा छोर्जि । ताम नोन कादे ज्याना लासि पाङ्बा । ज्युमनेमा नोन कादे जेबा म्राङ्बा । लानिहोइला लानिह्राङ्बा । ह्याल ह्याल्बा ।

‘पिङगाइदा चाङ थेबा स्होम्याङसाम कादे ज्याबा तासेला टिम ।’ ङाला सेमरि खेन्जि ।

बिसि तिलासि, दात्ते पिङगाइला ब्रेल्बा लासि नोन जामे गि ताजिन्जिम ।

थेनोन दुइरि ज्योथेबादा पिङगाइसे बिबा थेजि, ‘जाजामा ङाइ एदा कादे सेम निमुबा । जामा एसेन ङादा वास्ता आलानि । ङाइचे सेम निसि तिलासे ? एसे सेम आनिमाइ हेर्लाम ? दात्ते नोन ङाला सेमला ग्लेमि एनोन हिन्ना ।’

ज्योथेबासे तिलाइ आबिनि, चेकाइसे पिङगाइदा च्यासिचे टिजि ।
ishworthokar@gmail.com