२०८० बेल्बो २८ गते ङा नोन भिडभाडला गुङरि राप्बा मुबा श्री क्यौले ठाना आधारभूत लोप्खाङरि । ङाए चु लोप्खाङला खेबाः लोप्पोन चासो ताबारि स्वभाविक नोन मुबा ।

बेल्बो २८ गते संयोग नोन तेन्तोला लोप्खाङरि गेताङ मुबाचिम । याम्बु ग्याम ग्यार्जाछा स्योमिकादे गिक्छारेम दोगाबा मुबा । खालाइ क्यामेरा थोबा, खालाइ नोटबुक ।

गिक्छारेम सेमरि खाजि, ‘तिगा च्याबारि खाबा मुसिम शहरीय म्हिकादे ङान्ना जाजाबा लोप्खाङरि ?’ तासाइ, खाइमा गेताङ तिजि ओम बुमोकादेसे स्याबारि चुजि... !

ङा कुटिसि थोमतासि चिजि । तालरि सेम दोङ्बा ह्राङ्बा । उर्जारि आत्मविश्वास ङ्हेबा ह्राङ्बा । थे दुइरि मि स्हाजि ।

तिक्खुरि, २०४९ दिङला ङाला लोप्खाङ केवा चलचित्र ह्राङ्नोन डान्जि । साप्राला पाङ्ग्याल, साला डेस्क, डेबा झोला । सेमरि खेबाः म्हाङकादे लेप्बेर्जि ।  

तासाइ दृष्य तिनि स्यान्दोन मुबा । चु बुमोकादेला स्याबारि ङाइ म्राङ्जि बाङ ! थेसे याम्बुमा तिगा, ह्युल ह्योङ्बारि खाम्लाह्राङ छोर्जि ।

ङामरि राप्चिबा याखारगि स्योमि कुटिसि फिस्सा ङेसि ङ्योइबाकेन मुबा– ‘आले ! चुह्राङ्बा प्रतिभामि याम्बुरि नोन च्याङ्नान स्याप्ला ।’

ङा ज्युम ङेजि । सेम न्हाङन्हारि पाङ्जि, ‘ह्राङ्निसेम तिनि म्राङस्ह्युजि, ङान्छेम चुन्दा रे दाङ्से छार्सिकेन म्राङ्जि ।’

थे रे... गर्वसे सेम डाकल्हिजि । ओम, सेमसे बिजि, ‘खानाङ सेम, थेरि ग्याम ।’

नाम्साला चु बुमोकादेरि थे सेम मुला– थेन्छे जाम्बुलिङ डाबारि खाम्ला ।

(छिगला अर्थः लोप्खाङ– स्कूल, बेल्बो– असार, खेबाः– पुरानो, लोप्पोन– विद्यार्थी, तेन्बा– मान्नु, स्योमि– पत्रकार, बुुमो– बालिका, दोङ्बा– मिसिएको, ङ्हेबा– पोखिएको, स्हाबा– रसाउनु, केवा– जीवन, पाङ्ग्याल– चौर, लेप्बेर्बा– लपेट्नु, जाम्बुलिङ– संसार)  

 दोःबा : यकिना अगाध