गिक्खे दुइ रुपचन्द्र विष्ट म्हेमे ङाला लोप्खाङ रत्न ज्योति निमाविरि खास्ह्युजि । ङा डा सोमरि डोमुबा ।

ह्रोला ङ्हाच्छा बिजा मुगाइ व्हा खेप्पा मोक्कोन अनुशासित तातोबा चिम । ह्रोसे यासे चुङ्बा माइकरि भाषण लाबाकेन मुस्ह्युबा । मोक्कोन बिजाबुमो, लोप्बोनजुगु कुटिसि भाषण ङ्यान्बाकेन मुबा ।

हेड सरसे तिगा खासखुस लास्ह्युजिम खाइ, ह्रेच्छाकरि बिष्ट म्हेमेसे केसिकेन सुङ्स्ह्युजि, ङाला भाषण जिन्माहेन्से जेक्खे खाउ ! बिसि थेग्याम्से हेडसरदा माङ्ग्यार तेपिन्जि ।

ङा ह्रोला सुङरि च्याचिबा मुबा । ह्रोसे थेदुइरि सुङ्स्ह्युबा याखारगि जेक्खे छिग डान्बा मुला– ‘मण्डले’ । ह्रोसे सुङ्बा स्यान्दोमि ङाइ आगोमुबा ।

ङा जाकि चकचके नोन मुबा । थेनोन दुइरि ङाला न्हाब्याङ ङामला क्रा ग्याप्से खाल्से छेङ्पिन्ग्याम ङाइ चाल नोन आयाङ्नि । तासाइ ङादा क्रा छेङ्बा म्हि ङोसेतोबा मुबा । ङा ङ्हाच्छा चिबासे लिच्छा फ्लिक दोसिमाम च्यानोन तोजि । थेनोन दुइरि बिष्ट म्हेमेला मि ङाफिरि परतिचिजिम ।

ह्रोसे भाषण लाबारि ख्लासि ङाला पाखुरारि चुङ्सि सेतथिसि क्याच्चा गुरि बोर्सि थानस्ह्युजि । ङा थेरिन चिजि । तासाइ फाइह्राङ्बा यासे पाखुरारि चुङ्सि थिमाला प्रेसर च्याङ्ना कोङ्बा आरेमुबा । ३÷४ रेदा गे छ्योजिन्बा मुबा ।

तासाइ दिमरि दोतेमा थे स्हुखाबा म्लेजिन्बा मुबा । थे दुइरि ङाला दिम छार स्होबाकेन मुबा । ङाइ मे फुइबा म्हेस्योङदा माइक स्होसि रेरि रुपचन्द्र बिष्टसे लाबा भाषण खाराङ्बा मुबा ओस्बान पाङ्बा मुबा । पाङ्बा बिमा नोन पे लाबा मुबा ।

तासाइ न्हाङ्गार दाङ्से ङाला दाहिने या तोरमार लाखाम्बा नाछालरि आरेमुबा । आमादा पाङ्जि, ‘चु थे म्हेमेसे लामा ताबा हिन्ना ।’

मकवानपुर ।

(छिगकि दोनः डा– कक्षा, बिजा– बाल, बिजाबुमो– बालबालिका, लोप्बोन– शिक्षक, पे– नक्कल, नाछाल– अवस्था)

दोःबा : यकिना अगाध