कुल्दुङ कुशेला दौतरीकादे बेनासे ब्रेल्साङ लाजिन्बासे कुशेसे नोन ब्रेल्साङ लाबा सामतेन लाजि । थेसे तिरे ङ्यासे मोक्कोनम्हे कान चाबारि चिबा दुइरि आपा झ्वाम्मबहादुरदा ब्रेल्साङ लाबा सामतेन पाङ्जि । कुशेला ताम थेसि ङ्हाच्छारिम क्योङम्हे ङेजि । रे थाल्सिकेन निमा कुशेला ब्रेल्साङला नुरदा किन्सि दिमम्हेरि माचिङ्बाला ताजि ।

झ्वाम्माबहादुर बाध्य तासि केटी म्हाइबारि ख्यारख्युरला नाम्सारिक्यार दोजि तासाइ खालाइसे कुल्दुङ्गे कोलादा जामे पिन्बारि आङ्यान्नि ।

तिरेकुनु याम्बुग्याम कलाकारकादेला याखारगि टोली छायांकनला लागि नाम्सारि खाजि । म्हुनाला चाबाथुङ्बा लाबा ङ्हाच्छा थेनिकादे व्हाइ कोसि रमाइलो लाचिबा दुइरि कुशे गोर ङ्ही सोम ह्रोथोसि कलाकारकादे चिबा होम स्टेरि दोजि ।

थेसे थेरि तिगाइ साव्हाइ थेन आधुनिक व्हाइ कोसि डोन्बोकादेदा मख्ख ताना लाजि । मोक्कोनसे कुशेला कोबा काइला ज्यानालासि प्रशंसा लाजि । कलाकार टोलीला नाइके कुशेला प्रतिभाग्याम आउदिन प्रभावित ताजि ।

थेसि बिजि, ‘आले ! ल्हुइ एला खात्दामान तासाइ नोन ए याखारगि ज्याबा काइपा चिम । कोबा थुमरि एसे तहल्का जाखाम्ला । स्यान्दो लारि ङान्ना टोली युरोप कोर्बारि निबाकेन मुला । तिगा ए ङान्तेन निबारि खाम्ला ?’

कुशेसे तिक्खुरि नाइकेला प्रस्ताव ङ्यान्जि ।

लिच्छारि कुशेला युरोप ल्हाम पक्का ताजि । थे तिगाइ रेरि ङ्हाच्छाला ग्यारेमला लागि याम्बुरि नितोबासे तयारीरि वाङ्जि ।

चुर्से कुशे युरोप निलाबा तामसोर नाम्सारि मे डुडुइ दोसि ल्हेबातेन तिल्मा जामे आपिन बिबाकादे दिमरिन खासि झ्वाम्माबहादुरदा जामे पिन्बारि गिसेम गि ङ्हाच्छा वाङ्जि ।

२०८२/०३/२०

(छिगला अर्थः ह्रिक्पा– प्रवृत्ति, कुल्दुङ– बामपुड्के, समतेन– विचार, म्हे– जना, नुर– विषय, माजिङ्बा– भाँडभैलो, साव्हाइ– लोक गीत, काइपा– गायक, जाखाम्ला– मच्चाउन सक्छौ, ल्हाम– यात्रा, ग्यारेम– अभ्यास)

दोःबा : यकिना अगाध