गीता आमा स्ह्योरि रेजि । दिम बोक्टो मुबा तासाइ ख्राङ्गा तिनि दोसि छारह्राङ्बा छोर्जि । ख्रिनला वान ङामला लिङ्गे पिङ, परालला छानो, साप्रासे च्युर्बा कुदाप– स्यान्दो तिलाइ लेङ्बा मुबा तासाइ केवाला चहलपहल बिप्बा मुबा ।
चाङ मोबाइलरि ब्यस्त मुबा, छायाकादे भिडियो गेमरि । रेडियो खानाङ ङ्ह्याला ले दारे ? मालश्री धुन मोबाइलग्याम ह्राप्बारि म्हाइमा, थे जादु छ्योल्बाह्राङ छोर्मुबा ।
गीता आमाला सेमरि याखारगि बिजादुइला म्हेनिङ होङ्जि– आपा ग्लुपिन्बा डोइखाबा कोट, ख्राङ्गानाङ मखमली सार्बा, भान्साग्याम खाबा कुदापला थाङ ।
‘म्हेनिङ म्हेनिङह्राङ आछोर तिन्हाङ्गार’, थेसे पाङ्जि । थेनोन दुइरि नातिनी प्रियंका मामला ङामरि खाजि ।
‘माम ! मखमली म्हेन्दोम ल्हानान चिम व्हारिरि । ह्याङ्से माला स्होइले होइ !’
गीता आमाला मिरि ह्याल खाजि । थेसे प्रियंकादा बोर्सि ख्राङ्गा साङ्जि, रेडियोला धुलो फ्याजि ओम याखारगि बोक्टो टेपरि मालश्री होङ्ना लाजि । गोल्छेसे दिमम्हे पोप्बारि चुजि– चाङ्से कुदापरि म चोल्चि कोलासे पिङ खिबारि चुजि ।
थेकुनु म्हेनिङ खाजि जेक्खे आहिन, सोजि नोन ।
डान्बाग्याम पुनरावृत्ति ताजि– प्रिबाला, रिमठिम थेन चेगाइ–ममतादा दोसि खिबा सुत्रला ।
गीता आमासे ज्युमङेसि डान्जि–
‘म्हेनिङ दोसि म्हेनिङ दोजि ।’
मिरिक, दार्जिलिङ ।
(छिगला अर्थः वान– झ्याँङ, बिप्बा– गुम्सिनु, होङ्बा– गुन्जिनु, चोेल्बा– सल्काउनु, प्रिबा– चाडपर्व, चेगाइ– माया)
दोःबा : यकिना अगाध
तपाईको प्रतिक्रिया दिनुहोस