नेपालरि जनयुद्ध लाचिबा थेदुइला नेकपा माओवादी थेन नेपाल सरकारला गुङ्रि गेलाचिबा अन्मिन (ग्ल्ःक्ष्ल् ग्लष्तभम ल्बतष्यलक ःष्ककष्यल ष्ल ल्भउब०ि से योना योना ग्रेन स्हिवाङ प्रकृयालाई थुम्ना लाबाइकेन मुबा । लोला खिम्जे ह्युलसे अन्मिनला म्याद काप्बाथोरि आउदिन चासो किन्चिबा मुबा । नेपालबिमा खिम्जे ह्युल ओस्सोन ल्हाना दार्चिबा मुबा । अन्मिनतेन ल्हानान सतर्क मुबा । हदम्याद न्हाङरिन स्हिवाङ प्रकृयाला गे जिन्सिमाम थेतेन ब्रेल्चिबा खाजिबाइ शाखा नेपालरि आचिगाइ बिबा आशय मुबा थेला । थेरि ल्हाना चिन्तित मुबा ।

चुनोन ताङरि माओवादी लडाकु गुङ्ला बिजा सैनिक बिसि ट्याग ल्हागाब लाबा थेन थेनिकादेदा सामान्य केवारि दोसि बोर्बा योजना न्हाङ्ला नेपालला नामूद जापानिज सार ब्लि होटलरि गोर ङ्हि आङाजुगुदा होटल कुबारि बासि भर्ना लापिन्जि । ङान्छे थे आङाजुगु ङ्हिला मिन म्लेजिन्जिम । तासाइ ङान्छे बिसाम थेन्दा अन्मिन आङा बिमुबा ।

खाराङ खाराङ्लासि थेनि ङ्हिला बारेरि ङान्ना युनियन नेता विनयदा ग्रादाङ पिन्जि । पार्टीला व्हनाग्याम अन्तरिम संसदला सांसद् थेन याखारगि पिएलए लडाकु ओम अन्मिनला सम्पर्क ब्यक्तिग्याम । कुबा ख्लाबारि आपिन्गो, गे लाबा ग्लारि कोङ्ह्राना थान्गो ओम जाजाकार निगरानी थानपिन्गो बिसिमाम ।

कुबारि भर्ना ताजिन्माहेन्से थे ङ्हिनोन आङानिसे युनियन नेता विनयला अफिसरि खासि ङोसेबा पिन्जि ओम ङान्ना नाछाल चु हिन्ना बिसिमाम पाङ्जि । थेन्से थेरि ला डु दोना अन्मिनला निगरानीरि कुबा जिन्ना लाजि । हप्ता हप्ता रेरि थेन्ना बारेरि अन्मिन खामुबा ओम होटलला स्विमिङ पुल ङामरिन स्ह्योला दिनि दुबारि चिबा ह्राङ्लासि चिया थुङ्बान थेन्ना कुबाला बारेरि थेन स्यान्दो खाला खाला ह्रुप ताबारि खाचिमुला ? तिगा बिमुला बिबाह्राङ्बा ङ्योइबा विस्तृत स्ह्रुगरि ङ्योइबा लाबाचिम । चु ताम ङान्दा थेनोन लडाकु आङासे पाङ्मुबा । अन्मिनसे चुरि कुबारि युबा ताम नोन गोप्य मुबा । थेनिकादे लडाकू हिन्ना बिबा तामदा नोन माङ्ग्यार दोना लाबा आरेमुबा ।

थेन्ना कुबा जिन्बारि ला गि मुमान म्हेनिङ प्रिबा खाजि । म्हेनिङरि दिमरि निबा आपा आमा, नानाआङा, ह्रोजुगुतेन ह्रुप ताबा ओम ग्लाग्लाला लडाईंला घटना रापजुगु पाङ्बा उत्साह थेन्तेन चोदे ल्हाना मुबा कि थेनिकादे म्हेनिङरि दिम निबा दुइ कात्ते ङाम ङाम खाजि ओतेन म्हुनारि म्हेर्बारि ख्लाबा मुबा । जुम्बि क्युइसि रे ज्यामुबा ओम ताङ्सिकेन ङादा पाङ्मुबा ।

याखारगि फरासिली आङा मुबा । थेला दिङ २० हेन्से २२ न्हाङ्ला मुबा । चुनि ङ्हिनोन ब्रेल्साङ आलाचिबा मुबा । खाइमागि मुड चलतिजि बिसाम छारम्याङ स्वभावजन्य क्यालोस्यालो नोन लामुबा । खाइमागि बिसाम जनयुद्धला घट्नाजुगुला बयान लासि मोक्कोनदा चकित ताना लामुबा ।

थेसे मजदुर नेता विनयदा टायम अफिस ङामरिन कुबाला एप्रन क्वान्चिबान नाछालरि, ड्युटीरि ब्यस्त मुबा दुइरिन ङ्योइसिमाम बु गिरिन पाङ्जि–

‘विनय सर, चुपाल्छेमि धोको छ्योनाकि चु यानाङ चुहेन्से थेदोना ल्होलो तोसोला छोनला चुरा यानाङ क्वान्ना । आपाआमाला याला वाला टिका ङ्होनाङ ख्याप्ला । जमाराला पु ख्याप्सिमाम आमाला याग्याम्से दक्षिणा ताला । ङान्ना नाम्सारि म्हेनिङरि पिङ जुमुला, आउदिन क्लाङ्ला । ह्रोतेन दोहोरी पिङ बाङ्से जाला । आस्याङला दिमरि निला । ङेङ्गोरला दिमरि निला ।’

विनयले स्हिवा काइरि पाङ्जि, ‘तिल्दा चोदे ल्हाना भावुकता थेन उत्सुकता ? तिगा दातेदोना म्हेनिङरि टिका ख्याप्बारि आखामुबा ओम चुह्राङ बितोबा ?’

‘हिन्बान... कोङ्ह्रवाला ङ्यान्दिसे लामा म्हेनिङरि दिमरि निआम्याङ्मुबा सर । ल्हुइला ताम मुबा । गोपनियताला ताम मुबा । म्हेनिङरि दोबादा सुराकी लासि हत्यारो सत्तासे सेमुबा ।’ थेसे पाङ्जि ।

थेसे दोसि पाङ्जि, ‘क्रान्ति सफल ताजि, दारेम खुल्ला ताजि, ओहो ! खाराङ्बा आनन्द छोर्बा मुला ।’

दोसि पाङ्जि, ‘दारेम चु अनिमनग्याम फेम्याङ्साम कादे ढुक्क तासेला । जागिर नोन थेन्सेन ल्हागाब लापिन्ना बिबा मुला । च्यागेले विश्वासमि छोर्बा आरे ।’

म्हेनिङला बिदा ताबातेन थेनिकादे काभ्रे निजि । जामाकुनु ङानि चुनोन ताम लासि विदा ताबा मुबा ।

होटलला नियमा आन्सार नोन थेनि ङ्ह्याला न्हाङ्गारदाङ्से हाजिर तागाजि । बिदा च्याङ्जि बिसिमाम गुनासो लाबाकेन मुबा । कुबा नोन दान्नाइ दान्नाइ छ्योगे लाजिन्बा मुबा ।

‘ङानि अन्मिनसे किन्बारि खामाहेन्से निला सर...’ बिसिमाम ग्रादाङ पिन्जि थेन्से ।

विनयसे ‘नाम्सादिमला रम्झम् थेन ब्रेल्साङ्ला छ्याम क्रान्तिला धार भुत्ते आतागाइ’ बिसिमाम ज्याबाम्हान्बा फुल्जि ।

जामाकुनु थेन्से बिजि, ‘ङान्ना विचार खात्दामान आपत बिपतरि नोन खाइमाइ आसि, सार्सि चिसेला मुला । क्रान्तिसे ङान्दा अविचलित ताबा थेन फाइह्राङ कोङ्बा लोप्बा मुला सर...।’ चुनोन बचनबद्धता लासिमाम लालसलामला छ्याम बिदा ताबा मुबा । दोसि ह्रुप तालाम्हाले बिसिमाम अन्मिन आङानि ।

अन्मिनसे थेन्दा खाइमाकुनु बोर्जि । थाहा आतानि । थेनि सामान्य नागरिक आरेमुबा, जनयुद्धला प्रतिबद्ध वाला सिपाही मुबा । 

स्टाफ गेटग्याम आहिन मेन गेटग्याम अन्मिनलान सवारी साधनरि थेन्दा बोर्बा लिच्छा जेक्खे थाहा ताजि ङान्छे ।

असोज १ गते २०८०, याम्बु ।

(छिगकि दोनः लो– दक्षिण, स्हिवाङ शान्ति, खिम्जे– छिमेकी, ब्रेल्चिबा– सम्बन्धित, बिजा– बाल, केवा– जीवन, कुबा– तालिम, ग्रादाङ– जानकारी, व्हना– तर्फ, कोङ्ह्राना– सुरक्षित, नाछाल– अवस्था, जाला– मच्चाउँछु, स्हिवा– शान्त, कोङ्ह्रावा– सुरक्षा, ङ्यान्दि– कारण, ब्रेल्साङ– विवाह)

दोःबा : यकिना अगाध