म्हुक्गि नाम ताइचिजि । न्हाङ्गारदाङ्से स्ह्योला ७ ङ्ह्यामाहेन्से झन मुसलधारे नाम ताइजि । थेलिच्छा याम्बु उपत्यका क्योङ्नोन क्युइसोक्खे ताजि । कादे ग्लारिम तला गिला दिम नोन क्योङ ब्लुम्जि ओम ग्यालाम, सडकरि स्योङ ब्योङ्चिजि । थेलिच्छा मन्जुश्रीसे थाबा चोभारला हुइग्याम क्युइला ब्योङ्बा खाराङ्लासि ब्योङ्बा मुला बिसि ङातेन गोरब्लि ह्रोकादे डिक्सि च्याबारि निजि ।

झरी ताचिबान मुबा । खाइमा थेनताला ह्राङ तामुबा बिसाम खाइमा झन ग्रेन ताइमुबा । ङानि चोभाररि दोजि, थेरि १५–२० म्हे म्हिकादे छाता कुसिमाम छलाङ छेप्सि छ्योङचिबा बागमती च्याबाकेन मुबा । खालाइ फेसबुकग्याम ङोन्छाङ प्रशारण लाचिबा मुबा, खालाइ भिडियो स्होबाकेन मुबा बिसाम खालाइ मिसे जेक्खे च्याचिबा मुबा । थेरि दोबातेन ङाला ह्रोकादेसे नोन ह्राङ्ह्राङला फोन तेसि फोटो खिचप लाबारि चुजि ।

उपत्यकाग्याम थोन्सि फिरफिरि छ्योङ्चिबा बागमतीदा क्योङसे मोबाइलरि युबाकेन मुबा । ङा नोन ज्याना लासि खिचतिबाला लागि बिसि चामला कुनिग्याम जाजाकि माङ्ग्यार खाली ग्लारि निजि । क्युइला ब्योङ्बासे दिरि मुबा गणेश लाथानला ख्राङ्गादोना छाल दोचिबा मुबा । ङा नोन ओहो ! कादे ग्रेन बिसि खिचप लाचिबा मुबा । थेरि याखारगि ५५–५६ दिङला ह्राङ म्राङ्बा आपासे सुङ्जि, ‘थेरि थानिउ बबु, दाते मार ताइला ।योना तोर खाउ ।’

चुह्राङ बिबातेन ङाइ योना योना फोनला क्यामेरा डुङ्जि । सेम लोङ्बा खाजि, खानाङ खानाङ याकाङ दार्बारि चुजि । 

च्यामा तामाङह्राङ छोर्बा आपाला लि म्राङ्मा ङाइ नाम्सारि मुबा ह्राङ्लान आपादा डान्जि ओम थे ङोआसेबा आपाला ङामरि निसि ङ्योइजि, ‘देन्बान म्हिदा छेङ्ला ओम आपा ?’

ह्रोसे सुङ्जि, ‘ङाइ थाहा तासिन गोर सोम ब्लि मार ताइजिन्बा मुला । चुह्राङ्बान दुइरि गाडिन मार ताइजि, याखारगि ट्याक्सी क्रेसि खाबा म्हिसे फालछेप्सि उद्दार लाजि । चुरि जलविनायक बिबा ला मुला । चुला बाङ्से लामा म्हिदा स्योङरि फाल छेप्के ह्राङ म्हान्ना लाला ।’

ङाइ थुजेछे आपा बिसि आजिन्जिमान ग्रेन नाम ताइजि । आपाल मिन ङ्योइनोन आम्याङ्नि ओम सेल्फी खिचप लाबारिन आम्याङ्नि ।

दाते ङादा थे दुइ डान्मा ल्हानान लोङ्बा खाचिबा मुला ।

(छिगला अर्थः म्हे– जना)

दोःबा : यकिना अगाध