ओन्मा दाङ्बो दुइरि मि
पेङदोर्जेसे स्हेङ्थान्बा 
डम्बुर घेरो क्वार क्वारबा 
यारि थोसि ह्राप्मामि
गादेज्याना ङ्ह्याबा दुइ दुर्बा ।

ह्रिस्याङ्गोला नाम्सारि 
तिनिला दुइसाङ गेताङरि 
ज्योन्खाबा हात्तर हात्तररि 
म्लाङगाइ पाटिला जात्थाररि 
ज्योन्खाबा डोन्बो ङेङ्गोरदा
ह्रिस्याङ्गोला गोन्बोरि 
नाङसाल म्हार्मे म्ह्ला फुल्जि
ताम्बाखोरला थेत्माइसे 
डम्बुर ह्राप्सि फ्याफुल्जि 
ह्या ल्हास्सो डान्ना चेगाइ लाला होइ ।

ताम्बाखोरला थेत्माइसे 
फ्राल्सि बाला ङ्हाच्छाला ताम
ग्याम ग्वाला पाटि डाख्रेला दिम
म्हुना थेरिन म्हेर्बा चिम
याम्बुसे चोर चोर खामामि 
चौबास भुम्लोरि दोखामा
साङसोति गाङरि खासिनाम 
ङाच्छाला जात्थार साङसोति
म्हुनगिक जात्थार च्यासिनाम
ब्राउ निगे दामाम बिसिनाम
होत्छे तोर तोर खामामि
बेङगाडि बाखोर कठि ग्याल्बा
दखिनधारा म्हान्दु पाङ
दाबुर थोरि डाक्ख्रेला छाङ
सिल्बा सिल्बा क्युइ थुङ्सि
सेमला दुङाल प्रासाल्बा ।

ह्रिस्याङ्गोरि दोखामा
च्युर्गुन बुर्गुन बुरुरु
सिल्बा लाबा हुुरुरु
गोन्बो न्हाङरि ला ज्याल्सि 
मार्से दिङसि च्यामामि 
पुतलि पाटि गोलाङ स्योङ
गोलाङ स्योङरि फाइला चाम
याम्बु जिरि ब्राबा ग्याम ।

लाहारे म्हाने म्हान्डाङ गाङ 
म्हान्डाङ गाङसे तोर च्यामा
म्लाङगाइ पाठि छेर्मादोङ
पाठिला गुरि चिसिनाम 
जालमाया स्होगे बिसिनाम 
काक्लिङ गाङरि खासिनाम
पाटिला जात्थार बिसिनाम
गोन्बोला लादा गोम्सिनाम
आइ ङा ह्यार्नोन जोम्सिनाम
स्हेङ्सि थान्बा चु डम्बुर 
स्हेङसि थान्बा चु टुङना 
डम्बुर ह्राप्पा ताक धुँइधुँइ
टुङनामि ह्राप्पा टुनुनु
ह्रुप ताबा ज्योज्यो नानाआङा
स्यागेले ह्याङनोन फुनुनु
ह्या ल्हास्सो ङाम्बा म्हान्ना लाला होइ ।

ह्रिस्याङ्गो, सिन्धुपाल्चोक